Хүүхэд байхдаа би сэтгүүлч болно гэж огт төсөөлж байгаагүй. Арван жилээ төгсөхдөө л сэтгүүлч болохоор шийдсэн. Энэ шийдвэрийг гаргахад хамгийн их нөлөөлсөн хүн бол манай эгч.
12 дугаар ангиа төгсөөд элсэлтийн шалгалтаа өгсөн хойноо ч яг ямар сургуульд ямар мэргэжлээр сурахаа ч шийдээгүй, яахаа ч мэдэхгүй тайван, амгалан явсан би эгчийнхээ өгсөн зөвлөмжийн дагуу сэтгүүлч болохоор шийдсэн. Юун түрүүнд сурах сургуулиараа “ Хүмүүнлэгийн Ухааны Их Сургууль”-ийг сонгосон. Тэгээд сургуультайгаа очиж танилцан, аав ээжтэйгээ зөвшилцсөний эцэст сэтгүүлч мэргэжлээрээ эргэлт буцалтгүйгээр сурахаар шийдсэн.
Сэтгүүлч мэргэжлээр сурах нь надад их зүйлийг нээж өгсөн. Мэдээллийг хэрхэн үнэлэх, үнэн худлыг ялгах, эх сурвалжтай ажиллах зэрэг ур чадваруудыг эзэмшиж эхэлсэн. Цаашлаад би янз бүрийн мэдээллийн сайтуудыг сонирхож эхэлсэн. Хэвлэл мэдээллийн орчин хэрхэн ажилладаг, мэдээ хэрхэн бичигддэг, бодит мэдээллийг хэрхэн нягталдаг талаар сурсаар байгаа. Энэ бүхэн сэтгүүл зүйн салбар луу намайг улам ойртуулсан. Энэ бол зүгээр нэг мэргэжил биш, харин нийгэмд өөрчлөлт авчрах хүчтэй хэрэгсэл юм билээ.
Гэхдээ би сэтгүүлч болж чадах болов уу гэж их айж байсан. “Би сэтгүүл зүйн чиглэлээр явж чадах хүн яг мөн болов уу?” гэх асуултыг өөрөөсөө хэд хэдэн удаа асууж байсан. Чадахгүй мэдэхгүй зүйлүүд ч их гарж ирсэн. Шинэ орчин, шинэ сургууль жаахан тухгүй санагдаж, шантраад больё доо гэж бодох үеүүд ч олон байсан. Сургуулиасаа гарах, шилжих, хаях талаар ч их бодож байсан, гэхдээ энэ бүгдийг туулахад тусалж дэмжиж, ярилцаж байсан дээд курсын ах эгч нартаа их баярладаг даа. Тэд нарын зааж зөвлөснөөр хичээлүүдээ улам илүү ойлгож, сургуульдаа сурах хүсэл эрмэлзэл ч нэмэгдсэн.
Сэтгүүл зүй бол нийгмийн тулгуур салбар. Хэвлэл мэдээлэл нь үнэн зөв мэдээллийг дамжуулж, иргэдийн ойлголт, хандлагад шууд нөлөөлдөг. Иймээс сэтгүүлч өндөр ёс зүйтэй, хариуцлагатай байх ёстой гэж би боддог. Миний зорилго бол мэргэжлийн сэтгүүлч болж, нийгэмд шударга ёсыг дэмжих, цаг алдалгүй иргэдийг мэдээллээр хангаж ажиллах телевизийн мэдээний хөтлөгч болох. Энэ бол миний хүсэл, мөрөөдөл, зорилго юм.
Сэтгүүлч болох шийдвэр маань миний амьдралын хамгийн чухал сонголтуудын нэг. Энэхүү сонголтдоо үргэлж бат зогсох болно.
Дадлагажигч оюутан Д.Анужин
