Монгол Улсын Монополын эсрэг газар БНХАУ-ын Зах зээлийн зохицуулалтын ерөнхий газартай харилцан ойлголцлын санамж бичиг байгууллаа.
Монгол Улсын Ерөнхий сайд Л.Оюун-Эрдэнэ Бүгд Найрамдах Хятад Ард Улсад энэ сарын 4-7-ны өдөр хийсэн ажлын айлчлалын үеэр Монгол Улсын Шадар сайд Т.Доржханд БНХАУ-ын Зах зээлийн зохицуулалтын ерөнхий газрын сайд Луо Вэнь нар “Монгол Улсын Монополын эсрэг газар болон БНХАУ-ын Зах зээлийг зохицуулах ерөнхий газар хооронд өрсөлдөөний салбарт хамтран ажиллах харилцан ойлголцлын санамж бичиг”-т гарын үсэг зурж баталгаажууллаа.
Манай хоёр улсын харилцан ашигтай хамтын ажиллагаа тасралтгүй өргөжин тэлж, худалдааны цар хүрээ тогтмол өсөж байгаа энэ үед өрсөлдөөний бодлого, хууль тогтоомжийн хэрэгжилтийг хангах нь нэн тэргүүний асуудал болж байна. Уг баримт бичгийг байгуулснаар шударга өрсөлдөөнийг хангах чиглэлээр нийтийн ашиг сонирхлыг хөндөж буй асуудлыг шийдвэрлэхэд хамтран ажиллах, энэ чиглэлээр тус тусын мөрдөж буй хууль, эрх зүйн баримт бичгийн талаар мэдээлэл солилцох, сургалт, семинар, судалгааны ажлыг хамтран зохион байгуулах, шинээр дагаж мөрдөх зохицуулалтын талаар харилцан мэдээлэл солилцох зэрэг өргөн хүрээний асуудлыг хамарсан хамтын ажиллагааг хөгжүүлэх эрх зүйн үндэс тавигдах юм.
Монгол Улсын Монополын эсрэг газар нь Бүгд Найрамдах Хятад Ард Улсын Зах зээлийн зохицуулалтын ерөнхий газар (SAMR)-тай хэрэглэгчийн эрхийг хамгаалах болон өрсөлдөөний салбарт 2018 оноос хойш хамтран ажиллаж ирсэн гэж Монополын эсрэг газраас мэдээллээ.
