Монгол Улсын Хөгжлийн 2025 оны төлөвлөгөөг батлах тухай УИХ-ын тогтоолын төслийн эцсийн хэлэлцүүлгийг хийж батлав.
Эдийн засгийн байнгын хорооны санал дүгнэлттэй холбогдуулан гишүүд асуулт асууж, хариулт авсан. УИХ-ын гишүүн, Батлан хамгаалын сайд С.Бямбацогт Хөгжлийн төлөвлөгөө хэлэлцэх хүрээнд хөдөө, алслагдсан бүс нутагт татварын ялгаатай бодлого хэрэгжүүлэхгүй бол ард түмний амжиргаанд шууд нөлөөлж байгааг хэлсэн. УИХ-ын гишүүн Д.Үүрийнтуяа төсөлд Эрдэнэт үйлдвэрийн ил уурхайн баяжуулах төсөл гэж агуулгын алдаа гарсныг тодотгож, редакцийн засвар хийх саналыг хэллээ.
Монгол Улсын хөгжлийн 2025 оны төлөвлөгөөг “Алсын хараа-2050” Монгол Улсын урт хугацааны хөгжлийн бодлого, “Шинэ сэргэлтийн бодлого”, “Бүсчилсэн хөгжлийн үзэл баримтлал”-д нийцүүлэн “Монгол Улсыг 2021-2025 онд хөгжүүлэх таван жилийн үндсэн чиглэл”, “Засгийн газрын 2024-2028 оны үйл ажиллагааны хөтөлбөр” зэрэг дунд хугацааны хөгжлийн төлөвлөлтийн баримт бичгүүдэд тусгасан зорилго, зорилттой уялдуулан Монгол Улсын Ерөнхийлөгч, Засгийн газраас санаачилсан “Хүнсний хувьсгал”, “Цагаан алт” үндэсний хөтөлбөр, “Монголд зочлох жил”, “Залуучуудын жил”, “Шинэ хоршоо-Чинээлэг малчин”, “Атар-IV тариалангийн тогтвортой хөгжлийн аян”-ы хэрэгжилтийг эрчимжүүлэхэд чиглэсэн нэн тэргүүнд хэрэгжүүлэх бодлогын төсөл, арга хэмжээнүүдийг тусгалаа.
Эдийн засгийн бодлогын хүрээнд урт хугацааны тогтвортой хөгжлийн суурь дэд бүтцийг бий болгох 14 мега төслүүдээс 2025 онд хэрэгжүүлж эхлэхээр тусгасан юм.
Монгол Улсын хөгжлийн 2025 оны төлөвлөгөө батлах УИХ-ын тогтоолын төслийн эцсийн хэлэлцүүлгийг чуулганы хуралдаанд оролцсон гишүүдийн 67.3 хувь нь дэмжиж баталлаа. Үргэлжлүүлэн Монгол Улсын 2025 оны төсвийн төслийг хэлэлцэж байна.
