Ерөнхий аудитор Сандагийн Магнайсүрэн Монгол Улсын 2026 оны төсөвт оруулах өөрчлөлтийн төсөлд хийсэн аудитын дүгнэлтийг танилцууллаа
Монгол Улсын Ерөнхий аудитор Сандагийн Магнайсүрэн өнөөдөр (2026.09.07) Улсын Их Хурлын ээлжит бус чуулганы нэгдсэн хуралдаанд Монгол Улсын 2026 оны төсөвт оруулах өөрчлөлтийн төсөлд хийсэн аудитын дүгнэлтийг танилцууллаа.
Аудитаар төсвийн тодотголд тусгасан өөрчлөлтүүд нь урт, дунд хугацааны бодлогын зорилтуудтай нийцэж байгаа боловч урсгал зардлыг нэмэгдүүлж, хөрөнгө оруулалтын санхүүжилтийг бууруулсан нь цаашид төсвийн болон үнийн тогтвортой байдалд эрсдэл учруулж болзошгүй гэж дүгнэжээ.
Төсвийн тодотголд:
- Нэгдсэн төсвийн тэнцвэржүүлсэн орлогыг 31.9 их наяд төгрөг
- Нийт зарлагын дээд хэмжээг 33.9 их наяд төгрөг
- Төсвийн алдагдлыг 2.0 их наяд төгрөг буюу ДНБ-ий 2 хувьд хүргэхээр тооцсон байна.
Мөн төсвийн орлого төлөвлөсөн хэмжээнд бүрдээгүй тохиолдолд төсвийн тогтвортой байдалд эрсдэл учирч болзошгүйг онцолж, цалин, тэтгэврийн өсөлт нь өрхийн орлого, дотоод эрэлтийг нэмэгдүүлэх эерэг нөлөөтэй ч инфляцын дарамтыг нэмэгдүүлэх эрсдэлтэйг анхаарууллаа.
Дэлгэрэнгүй мэдээлэлтэй дараах холбоосоор нэвтэрч танилцана уу: https://audit.mn/content/detail/45088
