Би Баянгол дүүргийн Х хороонд амьдардаг, есдүгээр ангийн сурагч. Сургуулиас гэр хүртэлх зай ойрхон болохоор ирж очих замд хүндрэл гардаггүй. Харин хичээлийн дараа, амралтын өдрүүдээр чөлөөт цагаа өнгөрүүлэх газар байдаггүй нь хэцүү. Уг нь би найзуудтайгаа хамт бөмбөг тоглох дуртай. Гэвч зориулалтын талбай бага, байгаа нь хүрэлцдэггүй. Тоглоомын талбай олоод тоглохоор эргэн тойронд хүүхэд хөгшид агаарлаж байгаа тул чанга дуу чимээ гаргаж, хөдөлгөөн ихтэй тоглоход бэрхшээлтэй. Гэхдээ үнэхээр тогломоор байдаг болохоор болгоомжлоод л тоглоно. Гэсэн ч сууж буй хүмүүсийг санамсаргүй бөмбөгөөрөө онож, цохих тохиолдлууд гарна. Тэр болгондоо очиж уучлалт гуйдаг ч зарим хүмүүс шууд уурлаж хараадаг. Том бас хүрэлцээтэй тоглоомын талбай, ногоон байгууламжууд байдаг бол хэн хэндээ хүндрэл учруулахгүй л байх… Хотод нийтийн эзэмшлийн газар хомс, байгаа жижиг газрууддаа багталцахгүй бие биедээ уураа гаргаад байх нь хэцүү шүү.
Чөлөөт цагаа сонирхлоороо эрүүл, зөв өнгөрүүлэх санаатай бөмбөгөө тэвэрч гараад аав, ээжээсээ ч сонсож үзээгүй хатуу үгээр танихгүй хүнд хараалгуулаад гэртээ орж ирэх муухай шүү.
Л.Уянга
