Боловсролын үнэлгээний төв хоёр жилийн өмнөөс элсэлтийн шалгалтыг жилд хоёр удаа, монгол хэл бичгийн шалгалтыг дөрвөн удаа зохион байгуулдаг болсон. Элсэлтийн шалгалтыг жилд хоёр удаа зохион байгуулснаар шалгуулагчид дүн оноогоо ахиулах, өмнө нь хамрагдаж чадаагүй сурагчдад боломж олгох юм.
2024 оны өвлийн элсэлтийн шалгалт болон Монгол хэл бичгийн шалгалтын цахим бүртгэл ирэх Пүрэв гаригт /2024.10.10/ 09:00 цагт эхэлнэ.
Бүртгэл арваннэгдүгээр сарын 10-ныг хүртэл eyesh.eec.mn цахим хуудсаар явагдахыг Боловсролын Үнэлгээний Төвөөс мэдээлэв.
Энэ удаагийн шалгалтад дүн оноогоо ахиулахыг хүссэн, өнгөрсөн зургаадугаар сард зохион байгуулагдсан шалгалтад орж чадаагүй, бүрэн дунд боловсролын гэрчилгээгээ авсан хэн боловч хамрагдах боломжтой.
