Цахим орчинд их хэмжээний цагийг өнгөрөөж буй өсвөр үеийнхэн түүнээс илүү чухал зүйлс болох гэрийн даалгавар, гэр бүлтэйгээ өнгөрөөх цаг гэх мэтэд анхаарлаа төвлөрүүлж чадахгүй байна.
Интернет донтолттой хэмээн оношлогдсон өсвөрийнхний тархины анхаарал удирдах, ой санамжны ажиллагаа зэрэг бусад хэсгүүдийн хоорондох дохио тасалдсан байгааг хамгийн сүүлийн үеийн судалгаа ч илрүүлсэн.
Энэхүү судалгаа нь 10-19 насны хүүхдүүдийн тархины үйл ажиллагааг 2013 оноос 2022 оны хооронд ажигласан байна. Интернет донтолтод өртсөн хүүхдийн тархины удирдлагын хэсгүүд огцом саатдаг буюу анхаарал, төлөвлөлт, шийдэл гаргах зэрэг үйлдлүүдийн хоорондын ажиллагаа удааширч зарим тохиолдолд зогсдог. Мөн бодит амьдрал дээрх нийгмийн оролцооноос холдож, бусадтай хамтарч ажиллах чадвар огцом буурдаг байна. Биеийн хөгжил эд явагддаг энэ үед тархины үйл ажиллагаанд сөрөг нөлөө явагдаж эхлэх үед эрүүл мэнд, бие физиологи талаасаа ч олон өвчний шинж тэмдгүүд илрэх аюултай аж.
Ялангуяа интернетийг хөлд орсон цагаас эхлэн ашиглаж сурдаг болсон энэ цагт уг өвчний талаар хүмүүс санаа зовохоо больж, байдаг л зүйл мэтээр хүлээн авах нь элбэг. Тийм ч учраас энэ төрлийн эмнэлгийн онош ч гарах боломжгүй байдаг хэмээн Батс Их Сургуулийн доктор Давид Эллис хэлсэн. Гэвч хүүхдүүд өөрийнхөө биеийг чагнаж шаардлагатай тохиолдолд эмчид хандахыг тэрбээр зөвлөсөн юм.
Өглөө сэрсэн даруйдаа утсаа нээж, шүдээ угааж байхдаа ч ТикТок үздэг өсвөр үеийхэн байвал энэ зун тархиа амраан утасны хэрэглээгээ хүчээр байсан ч багасгаж дадахыг уриалж байна.
Эх сурвалж – https://edition.cnn.com/2024/06/04/health/internet-addiction-teen-brain-activity-wellness/index.html
Бэлтгэсэн дадлагажигч оюутан Э.Номин
