Гадаадын орны зарим сургуулиуд хүүхдүүдийг утсаа ангидаа авчрахыг зөвшөөрдөггүй. Сургуулиудад утсыг хориглох тухай хууль тогтоомжийг олон хот, мужид баталсан байдаг. Гэвч сургууль дээр гэнэтийн халдлага гарах гэх мэт яаралтай үед хүүхдүүдтэйгээ холбогдохыг хүсдэг тул эцэг эхчүүд энэ арга барилд шүүмжлэлтэй ханддаг аж.
2023 оны Common Sense Media-ийн судалгаагаар 11-17 насны хүүхдүүдийн 97 хувь нь хичээлийн цагаар буюу дунджаар 43 минут утсаа ашигладаг гэж гарчээ.
Нийгмийн сэтгэл зүйч Жонатан Хайдтын “Сэтгэлийн зовуурьтай үе: Хүүхэд насны их өөрчлөлт нь сэтгэцийн өвчний тархалтыг хэрхэн үүсгэж байна вэ” номдоо бичсэнчлэн залуучуудын хийх ёстой хамгийн чухал зүйлсийн нэг бол үе тэнгийнхэнтэйгээ тоглох явдал юм. Ингэхдээ тэд нийгмийн динамикийг удирдан чиглүүлж, янз бүрийн үйл ажиллагааг хэрхэн хийхийг олж мэдэх замаар ур чадварыг бий болгож, сурдаг. Энэ нь тэдэнд ирээдүйд тулгарах бусад сорилтуудыг даван туулж чадна гэдгийг заадаг бөгөөд тэднийг түгшүүрээс хамгаалахад тусална гэж Хайдт хэлжээ.
Зургаадугаар сард Pew судалгааны төвөөс явуулсан судалгаагаар улсын дунд сургуулийн багш нарын 72 хувь нь гар утасны анхаарлыг сарниулах нь анги дунд тулгардаг гол асуудал гэжээ. Хэрвээ хүүхдүүд утсаа сэмхэн шагайж байгаа бол тэд юу сурах ёстойгоо анхаарч чадахгүй. Хүний тархи олон зүйл зэрэг хийх боломжгүй гэдгийг шинжлэх ухаанаар баталсан. Тархи зөвхөн төвлөрч буй зүйлээ ойлгож, таних системтэй байдаг.
Оюутнууд сургууль дээрээ ухаалаг утас дэлгэрэхээс өмнөх үеийнх шиг тийм ч их зүйл сурч чадахгүй байгааг илтгэх нэг үзүүлэлт бол коллежийн нэгдүгээр курст суралцахад шаардагдах англи хэл, унших, математик, байгалийн ухааны мэдлэгтэй эсэхийг хэмждэг стандарт тест болох ACT-ын оноо юм. Өнгөрсөн жил ACT-ын оноо сүүлийн 30 гаруй жилийн хугацаанд хамгийн доод түвшинд хүрч буурсан гэж тус шалгалтыг удирдаж буй байгууллагаас мэдээлсэн. 2010 оноос хойш таван их сургуульд багшилж байсан профессорын хувьд би өөрөө ийм хандлагыг харсан. Намайг анх багшилж эхлэхэд, ухаалаг утас хаа сайгүй түгээмэл болохоос өмнө олон шавь нар маань одоогийнхоос илүү төвлөрч, урт уншлагын хэсгүүдэд ажиллах чадвартай байсан гэжээ.
Сургууль дээрээ утасгүй бол хүүхдүүд анхаарлаа сошиал орчин дахь нөлөөлөгчид болон интернет меменүүдэд хандуулахын оронд үе тэнгийнхэнтэйгээ харилцах, сурч боловсрох, эргэн тойрондоо бүрэн дүүрэн байх тал дээр анхаарлаа төвлөрүүлж чадна.
Эх сурвалж: https://edition.cnn.com/2024/09/02/health/phones-allowed-school-children-wellness/index.html
