Асар хурдацтай өөрчлөгддөг загварын ертөнцөд өчигдөр “хоцрогдсон” загвартай гэж гологдсон хувцаснууд нэгхэн шөнийн дотор тренд эхлүүлэн шуугиулж чадахыг үгүйсгэх аргагүй. Энэ удаад зуу, зуун жилийн настай нэгэн хувцас эргэн хятад залуусын анхаарлыг татаж, зуны шинэ трендийг эхлүүлээд байна. “Мамианкүн” эсвэл “морин банзал” гэж нэрлэгддэг энэ хувцсыг Шанхай, Бээжин, Ченгдү хотын залуучууд орчин үеийн хэв маягт оруулан, өөр хувцас, давуутай хослуулан өмсч яваа нь түгээмэл нүдэнд тусах болжээ.
Түүхэндээ зөвхөн “Ханфү” хөдөлгөөн зэрэг онцгой үйл ажиллагааны үеэр өмсөгддөг байсан хувцас нь өнөөдөр залуучуудын дунд өдөр тутмын хэрэглээ болж байгаа нь сонирхолтой.
Уг урт банзал өргөн хэрэглээнд орохоос өмнө аль хэдийн уламжлалт хятад хувцас хэрэглэл, тэр ч бүү хэл хятад тавилгын элементүүдийг орчин үеийн хувцаслалтандаа шингээж өмсдөг тренд аль хэдийн дэлгэрээд байсан юм. Энэ трендийг “Шинэ Хятад Стиль” гэж нэрлээд буй.
Харин уг эрчимтэй дэлгэрч буй трендийг гярхай ажигласан хувцасны бизнес эрхлэгчид залуу үеийнхэнд чиглэсэн онлайн маркетинг явуулж, шинэ загварын коллекцуудыг ар араас нь гаргаж эхлэв.
Дөрөвдүгээр сараас хойш хятадын Weibo, Xiaohongshu зэрэг цахим платформууд дээр “Шинэ Хятад Стиль,” “Шинэ Хятад Стиль хувцасны санаа” гэх мэт хаштаг хэрэглэсэн хайлтууд 100 сая гаруй удаа давтагджээ. Хувцаснаас ч гадна бүх төрлийн арьсан бүрээстэй “хуучны” хэв маяг бүхий түшлэгтэй сандал, хятад модон тавилгын постууд ихэсч, хүмүүс хятад түүхэн үеийн зурагнуудыг утасныхаа зургаар сонгож эхэлжээ.
Эх сурвалж – https://edition.cnn.com/2024/06/16/style/new-chinese-style-gen-z-intl-hnk/index.html
Бэлтгэсэн Э.Номин
