Энэтхэг, Балбын Гималайн бүс нутгуудад өнгөрөгч пүрэв гарагт орсон аадар борооны улмаас үер болж, хөрсний гулгалт үүсснээр 10 хүн амь үрэгдсэн хэрэг гарчээ. Мөн хүчтэй аадар борооны улмаас Энэтхэгийн зүүн хойд Сикким мужид хоёр мянга 400 жуулчин гацсан байна. Нас барсан хүмүүсийн зургаа нь Сикким мужид, дөрөв нь Балбын Коши мужаас олдсон гэж албаны хүмүүс мэдээллээ.
“Сүүлийн 36 цагийн турш тасралтгүй бороо орж байна…бид цогцсыг гаргаж, ар гэрийнхэнд нь хүлээлгэн өглөө” гэж Сикким мужийн шүүгч Хем Кумар Четтри CNN-д ярьжээ. Борооны улмаас дор хаяж 45 байшин, зам, гүүр, дэд бүтэц “хүнд эвдэрсэн” гэж тэр нэмж хэлэв.
Бутан, Балбын хооронд хиллэдэг зүүн хойд Сикким муж нь 28 уулын оргил, 21 мөсөн гол, 200 гаруй нуур бүхий Гималайн байгалийн үзэсгэлэнт газруудаараа алдартай. Гэхдээ аль ч уулархаг бүс нутгийн нэгэн адил шар усны үер, хөрсний гулгалт ихтэй байдаг.
Өнгөрсөн жил аадар борооны улмаас тус мужид мөстсөн нуур хагарсны улмаас олон арван хүн нас барсан. Ирэх жилүүдэд ч хүний хүчин зүйлээс шалтгаалсан уур амьсгалын хямрал улам ширүүснэ гэж шинжээчид анхаарууллаа.
Эх сурвалж – https://edition.cnn.com/2024/06/14/india/india-sikkim-landslide-deaths-tourists-stranded-intl-hnk/index.html
Бэлтгэсэн дадлагажигч оюутан Э.Номин
