Хоёр жилийн өмнө Пиксар “Turning Red” хэмээх 13 настай охины тухай хүүхэлдэйн киног гаргаж байсан бол энэ жил тус студи “Бодлын ертөнц 2” хэмээх дахин 13 настай охины амьдралын тухай киног гаргаж байна. Яг адилхан сэдвийг ойрхон хугацаанд хоёр ч бүтээлдээ тусгаж байгаа нь хачирхалтай ч “Бодлын ертөнц 1”-ийг шимтэн үзсэн үзэгчид уг киноны үргэлжлэл гэдэг утгаар нь өндөр хүлээлттэй байгаа нь гарцаагүй.
Уг киноны эхний ангийн дүрүүд хэвээр үлдэж байгаа бөгөөд эдгээр нь 13 настай гол дүрийн охины бодол дотор орших уур хилэн, гуниг, баяр хөөр, айдас болоод жигшил нар юм. Гэвч гол дүрийн Райли охин мөсний хокейн зусланд явж, хоёр сайн найз нь өөр сургууль руу шилжих сургаар шилжилтийн насаа эхэлж буй түүний хувьд амьдрал хэцүү болж эхлэх аж.
Келси Манны найруулсан “Бодлын ертөнц 2” кино нь өсвөр насны хүүхдийн бодлын ертөнц энд тэдгүй мэдрэмжид хэлбэлзэн урсаж байдаг төвөгтэй зүйл гэдгийг хөнгөн бөгөөд хошин хэмнэлээр адал явдалт кино болгон хүргэжээ. Нью Йорк Таймсаас гаргадаг киноны үнэлгээнд уг хүүхэлдэйн киног энэ зуны хамгийн шилдэг кино болох магадлалтай хэмээн мэдээлсэн байна.
Бэлтгэсэн дадлагажигч оюутан Э.Номин