Флоридагийн Персийн булангийн далайн эрэгт аялагчдыг сонор сэрэмжтэй байхыг уриалж, гурван усанд сэлэгч рүү аварга махчин загас хоёр ч удаа дайрсныг мэдээллэв.
Флоридагийн баруун хойд хэсэгт орших Уолтон мужид баасан гарагт нэг эмэгтэй гарынхаа хэсгийг хазуулж, эцэстээ гараа тайруулахад хүрсэн байна. Үүнээс хоёр цаг хүрэхгүй хугацааны дараа зүүн зүгт дөрвөн милийн зайд орших өөр нэг далайн эрэг дээр өсвөр насны хоёр охин найз нөхдийн хамт усанд сэлж байсан бөгөөд тэд мөн халдлагад өртжээ. Охидын нэг нь хөлний дээд хэсэг, нэг гартаа их хэмжээний гэмтэл авсан бол нөгөөгийнх нь нэг хөл нь хөнгөн гэмтэл авсан гэж түргэний эмч мэдэгдэв.
Эрх баригчид далайн эрэг дээр завиар эргүүл хийж, зарим наран шарлагын газруудыг хаасан ч далайн аюултай амьтдын талаар анхааруулсан ягаан тугнуудыг байршуулан тухайн байгууллагуудын үйл ажиллагааг үргэлжлүүлсэн юм.
Флоридагийн Их Сургуулийн (ФИС) олон улсын акулын дайралтын файл мэдээгээр дэлхий даяар жил бүр 70-100 орчим акулын дайралт болж, таван хүн нас бардаг ажээ. Ихэнх халдлага нь далайн эрэг орчмын усанд, акулууд хооллодог элсэн модын ойролцоо тохиолддог бөгөөд хүмүүс далайн түрлэгт баригдаж, тэдний олз болох эрсдэлтэй байдаг. Жилийн энэ улиралд жижиг загаснууд их хэмжээгээр эрэг орчим үзэгдэх болсон нь баасан гарагт болсон гурван удаагийн халдлагад нөлөөлсөн байж магадгүй гэж Бэй Каунти цагдаагийн алба саналаа хуваалцлаа. Халдлага болсон цаг нь мөн үдээс хойш байсан нь тун ховор, сонирхолтой тохиолдол гэж Уолтон тойргийн цагдаа Майкл Адкинсон CBS телевизд өгсөн ярилцлагадаа дурджээ.
Эх сурвалж – https://www.bbc.com/news/articles/ce441vy593jo
Бэлтгэсэн дадлагажигч оюутан Э.Номин
