Киприйн нэгэн алдартай юүтүбэр Европын парламентын бие даасан гишүүнээр сонгогдлоо.
Фидиас Панайотоу өмнө нь өөрийгөө “хошин мэдрэмж сайтай” гэж тодорхойлж байсан бөгөөд түүний цахим сүлжээн дэх зарим бичлэгүүд нь Элон Маскаас эхлээд 100 алдартныг тэврэх, долоо хоногийг авсан дотор өнгөрүүлэх гэх мэт агуулгатай. 24 настай залуу контент бүтээгч 2.6 сая гаруй дагагчтай. Тэрбээр, улс төрийн туршлагагүй ч 19.4 хувийн саналаар гуравдугаарт бичигдэж байна.
“Энэ бол үнэхээр цочирдом, гэхдээ гайхалтай мэдээ байлаа” гэж Панайотоу хэлэв. Тэрбээр төрийн CyBC телевизэд хэлэхдээ: “Энэ үйл явдлыг намууд өөрсдийгөө илүү нээлттэй, орчин үеийн болгож, ард түмнийхээ үгийг сонсох ёстой гэсэн анхааруулга гэж үзэх ёстой” гэлээ.
Газар дундын тэнгисийн арлын улс нь 900 мянга орчим хүн амтай бөгөөд тэдний 683 мянга гаруй нь амралтын өдрүүдэд болсон санал асуулгад оролцохоор бүртгүүлсэн байна. Кипр дэх сонгуулийн ирц 2019 оны сонгуулийн 45 хувь байсан ч энэ жил 59 хувь болж өсчээ. Энэ үзүүлэлтийг мэргэжилтнүүд алдартай юүтүбэр Панайотоугийн нөлөө гэж тодорхойлсон юм. Филенюс мэдээллийн сайтын хийсэн дүн шинжилгээгээр Панайотоу 18-24 насныхнаас 40 хувийн санал, 25-34 насныхнаас 28 хувийн санал авчээ. Түүнээс гадна таван гишүүн мөн сонгогдсон.
Сонирхолтой нь өнгөрсөн жил Панайотоу галт тэргийн үнэ, таван одтой зочид буудлын өглөөний цайны төлбөрөөс зугтсан Юүтүб бичлэгээрээ япончуудын эгдүүцлийг ихэд хүргэж уучлалт гуйхаас өөр аргагүй болж байсан юм. Олон сая хүн үзсэн уг бичлэг нь түүнийг алдартай хурдны галт тэргээр Япон даяар аялж, бие засах газар нуугдаж, өвчтэй мэт дүр эсгэн тасалбарын төлбөрөөс бултаж байхыг бичсэн байдаг байна.
Ийнхүү Кипр улсаас залуусын төлөөлөл болж нэгэн сонирхолтой гишүүн сонгогджээ.
Эх сурвалж – https://www.bbc.com/news/articles/c4nnrwr72dqo
Бэлтгэсэн дадлагажигч оюутан Э.Номин
