Гашуун сухайт авто зам ХХК-иас зохион байгуулж байгаа “Бүү яар, Бусдыг хүндэл” аяны хүрээнд Таван толгойн бүлэг ордоос Гашуун сухайт боомт хүртэлх зам дагуу нүүрс тээврийн жолооч нарт замын нөхцөл байдлын талаарх мэдээлэл, анхааруулга санамж хүргэж ажиллаж байна.
Өмнөговь аймгийн Цогтцэций сумын Тавантолгой бүлэг ордоос Ханбогд сумын Гашуунсухайт хилийн боомт хүртэлх хатуу хучилттай, хүнд даацын нүүрс тээврийн 239 км авто зам дагуу замын хөдөлгөөний аюулгүй байдлыг хангуулах, зам тээврийн осол, зөрчлөөс урьдчилан сэргийлэх, холбогдох төрийн болон төрийн бус байгууллагуудтай хамтран ажиллах, жолооч нарыг авто замын хөдөлгөөнд зөв соёлтой оролцохыг уриалахад энэхүү аяны гол зорилго оршиж байгаа юм.
“Бүү яар, бусдыг хүндэл” аяны хүрээнд 2024 оны 05 дугаар сарын 15-ны өдрийн байдлаар дараах ажлууд хийгдэж байна. Үүнд:
- Зам тээврийн хөдөлгөөний хяналт, зохицуулалтын ажлын хүрээнд Өмнөговь аймгийн Цагдаагийн газрын дэргэдэх Гэрээт цагдаагийн хэлтэстэй хамтран Тавантолгой бүлэг ордоос Гашуун сухайт боомт хүртэлх нүүрс тээврийн хүнд даацын авто замыг ашиглаж буй нүүрс тээврийн хэрэгслийн бүрэн бүтэн байдлыг хангаж буй эсэх, хөдөлгөөний аюулгүй байдал, замын хөдөлгөөний дүрмийг баримтлах тухай 400 орчим нүүрс тээврийн жолооч нарт тараах материал олголоо.
- Авто замын хөдөлгөөний аюулгүй байдлыг хангуулах, урьдчилан сэргийлэх зорилгоор 200 орчим нүүрс тээврийн хэрэгслийн хурд хэмжиж анхааруулга, зөвлөмжийг өгч ажиллалаа.
- Нүүрс тээврийн жолооч нарын ажил, амралтын цагийн талаарх судалгааг хийж байна. Судалгааны үр дүнг үндэслэн ажил, амралтын цагийн горим зөрчигдсөн аж ахуй нэгжүүдэд зөвлөмж хүргүүлэх юм.
Орон нутгийн хамтын ажиллагааны хүрээнд Өмнөговь аймгийн Цогтцэций, Баян-Овоо, Ханбогд сумдын Засаг даргын Тамгын газартай хамтран:
- Тус сумдуудын Засаг даргын Тамгын газартай хамтран нөлөөллийн бүсийн малчдад шөнө оройн цагаар мал дайрагдах, осол гарахаас урьдчилан сэргийлэх түүнчлэн осол гарсан тохиолдолд авах яаралтай арга хэмжээ болон энэ талаарх холбогдох хууль тогтоомжийн танилцуулгыг хийлээ.
- Нөлөөллийн бүсийн зам дагуух малчдын 150 толгой бод малд цацруулагчтай хүзүүвч зүүх ажлыг зохион байгууллаа.
- Авто зам дагуу тээврийн хэрэгсэлд дайрагдсан малын сэг зэмийг зориулалтын дагуу булшлах ажлыг хийж гүйцэтгэлээ.
“Бүү яар, Бусдыг хүндэл” нөлөөллийн аян энэ сарыг дуустал буюу 2024 оны 5 дугаар сарын 01-31-ний хугацаанд үргэлжилнэ.