Цистит бол давсагны салстын үрэвсэл юм. Шээсний сүвээр нян орж, давсагны хананд үрэвсэл үүсгэснээс тухайн хүнд зовуурь илэрнэ. Ихэвчлэн эмэгтэйчүүдийн циститээр өвдөх боловч эрэгтэй хүн ч гэсэн тусах боломжтой байдаг.
Эрчүүдийн хувьд циститийн үед илрэх зовуурь ижилхэн илэрнэ. Үүнд:
- Шээс ойр ойрхон хүрэх
- Шээх үед шээсний сүвээр хорсох
- Бага хэмжээтэй шээх
- Шээс цустай гарах
- Шээс хөөстэй гарах
- Бага аарцаг орчим өвдөх
- Халуурах
Эрчүүдийн цистит үүсэх шалтгаан
- Голдуу нянгийн шалтгаантай байдаг.
- Мөн давсганд катетер удаан тавиулах, түрүү булчирхай томрох, чихрийн шижин болон ДОХ туссан үед дархлаа сулрах, шээсээ удаан барих зэрэг шалтгааны улмаас цистит үүсч болно.
Циститийг хэрхэн оношлох вэ?
Дотрын эмчид үзүүлж, шээсний ерөнхий шинжилгээ, шээсний ариун чанар, биохими шинжилгээ, давсагны дуран зэргийг өгч , оношоо тодруулна.
