“MORNING BIRD” булангийн уншигчдадаа мягмар гарагийн мэнд хүргэе. энэ удаад зохиолч Л.Өлзийтөгсийн шүлгээр өглөөг эхлүүлцгээе.
Зовлонг таригч хүслийнхээ
Зоргоор явах сайхан
Зоргоор дураар аашныхаа
Зоригонд бүдрэх сайхан
Салхилж, шуургалж, хийсэж
Сарнин зүдэвч өндийж
Санаснаар болдоггүй хорвоод
Санаснаар зүтгэх сайхан
Тэнгээр хэмждэггүй орчлонд
Тэрсэлж явах сайхан
Тэрслүү зангийнхаа бурууд
Тээглэж явах сайхан
Зөнгөөр, хорвоог сөрж
Зөрүүд аальдаа алгадуулж
Зөвхөн чиний төлөө
Хоёр бүдрэх сайхан
