Соёлын дэд сайд П.Баттөр Бүгд Найрамдах Солонгос Улсын METAA компанийн гүйцэтгэх захирлыг хүлээн авч уулзлаа.
Уулзалтын эхэнд тус компанийн гүйцэтгэх захирал О Сун Хо соёл урлагийн чиглэлээр төрийн байгууллагуудад зөвлөгөө өгөх, соёлын бүтээлч хотыг хөгжүүлэх чиглэлээр Бүгд Найрамдах Солонгос Улсын төрийн байгууллагуудтай хамтран ажилладаг туршлагаасаа хуваалцсан бол Соёлын дэд сайд П.Баттөр Монгол Улсын Засгийн газраас соёлын аялал жуулчлалыг хөгжүүлэх, Монгол Улсыг олон улсад сурталчлах чиглэлээр хэрэгжүүлж буй ажлын талаар танилцуулав.
Мөн Соёлын яамны зүгээс соёлын бүтээлч үйлдвэрлэлийг хөгжүүлэхээр ажиллаж байгааг дурдаж, энэ хүрээнд “Соёлын бүтээлч үйлдвэрлэлийг хөгжүүлэх тухай” хуулийн төслийг Улсын Их Хуралд өргөн бариад буйг мэдээлэв.
Талууд цаашид Соёлын бүтээлч хотыг хөгжүүлэх чиглэлээр болон Монголын сонгодог урлагийн тайзны бүтээлүүдийг мюзикл хэлбэрт оруулах боломжийн талаар ярилцаж, хамтран ажиллахаар тохиролцлоо.
