Өнгөрсөн онд улсын хэмжээнд нийт 64.7 сая толгой мал, үүнээс 4.8 сая адуу, 5.4 сая үхэр, 473.9 мянган тэмээ, 29.4 сая хонь, 24.6 сая ямаа тоологджээ. Түүнчлэн малын тоо толгой өмнөх оныхоос 6.4 саяар буурсан үзүүлэлттэй байна. Тухайлбал, хонь 3.3 сая, ямаа 3.0 сая, үхэр 162.1 мянгаар тус тус буурчээ. Харин адуу 8.6 мянга, тэмээ 3.4 мянгаар тус тус өссөн үзүүлэлттэй гарчээ.
2023 оны тооллогоор нийт сүрэгт хонь 45.5 хувь, ямаа 38.1 хувь, үхэр 8.3хувь, адуу 7.5хувь, тэмээ 0.7 хувийг эзэлж байна. Нийт сүрэгт таван төрлийн малын эзлэх хувийг мал хувийн өмчид шилжиж эхэлсэн 1990 онтой харьцуулахад ямааны эзлэх хувь 18.2 нэгж хувиар өсөж, харин хониных 12.9 нэгж хувиар, үхрийнх 2.7 нэгж хувиар, адуу болон тэмээнийх 1.3 нэгж хувиар тус тус буурчээ.
Улсын хэмжээнд Архангай аймаг адуу, үхрийн тоогоор, Өмнөговь аймаг тэмээний тоогоор, Хөвсгөл аймаг хонины тоогоор, Баянхонгор аймаг ямааны тоогоор тэргүүлж байна. Мал тооллогын дүнгээр Хөвсгөл аймаг нийт 5.7 сая толгой мал тоолуулж тэргүүлсэн бол, Төв аймаг 4.9 сая толгой, Архангай аймаг 4.8 сая толгой, Өвөрхангай аймаг 4.7 сая толгой, Хэнтий аймаг 4.4 сая толгой мал тоолуулж удаалжээ.