Өмнөд Солонгосын алдарт K-pop хамтлаг Jennie-гийн нэрээр шинээр нээсэн загасны төрөл зүйлийг албан ёсоор нэрлэжээ.
Шинэ төрөл зүйл нь зөгий өнгөт гови загасны төрөлд хамаарах бөгөөд шинжлэх ухааны нэрийг Brachygobius jennie хэмээн өгсөн байна. Судлаачид уг загасыг БНХАУ-ын Гуандун мужийн Хэнчин арлын мангровын бүсэд хийсэн хээрийн судалгааны үеэр илрүүлжээ. Морфологийн болон ДНХ-ийн шинжилгээгээр өмнө нь бүртгэгдээгүй шинэ зүйл болохыг баталсан бөгөөд судалгааны үр дүнг Zoosystematics and Evolution сэтгүүлд нийтэлсэн байна.
Зүйлийг нээсэн судлаач Jiangyan Tian судалгааны ажлаа хийх хугацаанд Женнигийн уран бүтээл өөрт нь урам зориг өгч байсан тул талархлаа илэрхийлэн түүний нэрээр шинэ зүйлийг нэрлэхээр шийдсэн гэжээ. Тэрээр энэ нь шинжлэх ухааны нээлт болон соёлын ертөнцийн сонирхолтой огтлолцол болсон гэж онцолсон байна.
Brachygobius jennie нь биеийн урт нь 9 миллиметр хүрэхгүй, өөрийн төрөл дотроо хамгийн жижиг зүйлүүдийн нэг бөгөөд толгойн ар хэсгийн дөрвөн нарийн хар судлаараа бусад ижил төрлийн загаснаас ялгардаг аж. Мөн энэ нь Brachygobius төрлийн загас БНХАУ-д анх удаа бүртгэгдсэн тохиолдол болжээ.
Шинэ амьтан, ургамлын зүйл нээсэн судлаачид олон улсын нэршлийн дүрмийн дагуу тухайн зүйлдээ нэр өгөх эрхтэй байдаг. Өмнө нь олон шинэ зүйлсийг урлаг, шинжлэх ухаан, спортын салбарын алдартнуудын нэрээр нэрлэж байсан бол энэ удаад Jennie-гийн нэр шинээр нээсэн загасны төрөл зүйлд мөнхөрчээ.
