Хүний эрхийн түгээмэл тунхаглал батлагдсаны 75 жилийн ойг тохиолдуулан зохион байгуулсан “Хархорум” Олон улсын кино наадам Улаанбаатар хотод энэ сарын 7-12-ны өдрүүдэд зохион байгуулагдлаа.
“Хархорум” олон улсын кино наадмыг энэ жил анх удаа хүний эрх, эрх чөлөөг сурталчлах нийтлэг ойлголт болоод сэдэвчилсэн мэдлэгийг таниулахын тулд кино урлагаар дамжуулан хүний эрхийг дээдлэх, зөв хандлагыг төлөвшүүлэх зорилготойгоор зохион байгуулсан байна.
Энэ удаагийн кино наадмыг Соёлын яам болон Монголын Үндэсний Кино урлагийн зөвлөл, Кино гүүр хөгжлийн холбоо НҮТББ, ЗГХЭГ-ын дэргэдэх Хүний эрхийн үндэсний хороо, Хүний эрхийн Үндэсний комисс болон бусад байгууллагууд хамтран зохион байгуулсан юм.
Наадмын хүрээнд олон улсын кино наадмууд болон Оскарын шагналт найруулагчдын бүтээлүүд багтсан бөгөөд 15 улсын 22 уран сайхны кино болон баримтат киног үзэгч олондоо толилуулсан бол уралдаанд нийт есөн орны 14 уран бүтээл өрсөлдөж шилдгүүдээ тодрууллаа.
Шилдэг бүрэн хэмжээний уран сайхны кино – “Эргэж ирэхгүй намар” МУСК
Хүний эрхийн агуулга бүхий шилдэг бүтээл – Францын “Амьтдын ертөнц” кино
Шилдэг баримтат кино – Америкийн “Шилжилт” кино тус тус шалгарчээ
