УРУУЛЫН ФИЛЛЕРНЫ ТУХАЙ ТАНЫ МЭДЭХ ЁСТОЙ ЗҮЙЛС

Филлер гэж юу вэ? 

Филлер буюу дүүргэгч нь арьсны зөөлөн эдийн янз бүрийн давхаргад нүүрний өө засах, арьсыг бэхжүүлэх, гэрэл сүүдэрийг дахин хуваарилах, үрчлээг багасгах зэрэг үйлчилгээтэй хийгддэг тарилга юм.

Хэрэв та уруулынхаа тэгш бус хэмийг засах, томруулахаар шийдсэн бол эдгээр баримтуудыг мэдэхэд илүүдэхгүй болов уу.

Уруулд силикон болон ботокс шахуулж болохгүй

Уруулд силикон болон ботокс шахуулж болохгүй. Учир нь энэ нь булчингийн эс, утас зэргийг гэмтээх, гажилт үүсэх зэрэг эрсдэлүүдийг дагуулдаг. Иймээс уруулд зөвхөн гиалуроны хүчил ашиглан өө засах болон томруулах үйлчилгээг хийдэг байна. Гиалуроны хүчил нь хүний биед агуулагдах бодис учраас ямар нэгэн сөрөг нөлөөгүй ба харшлын урвал өдөөдөггүй гэдгээрээ давуу талтай.

Гиалуроны хүчил нь түр зурийн нөлөөтэй

Гиалуроны хүчил уусдаг тул уруул томруулах үйлчлэл дээд тал нь зургаан сар хүртэл хадгалагдана. Харагдах байдал болон үйлчлэл хэр удаан хадгалагдах нь хувь хүний биеийн онцлог ба ямар төрлийн филлер ашиглаж буйгаас шалтгаалдаг.

Эрэгтэй хүмүүс ч ашиглах боломжтой

Уруулд филлер шахуулах нь зөвхөн томруулах зорилгоор бус нүүрний өө засах, тэгш бус хэмийг өөрчлөхөд ч мөн ашиглагддаг. Тиймээс гадаад үзэмжээ өөрчлөхийг хүсэж буй эрчүүд ч  туршиж үзэх боломжтой.

Өвдөлт бараг мэдрэгдэхгүй

Тарилгын өмнө эмч мэдээ алдуулах эм /тос, түрхлэг/-ийг уруул болон эргэн тойрны арьсанд түрхэх болно. Хэр хэмжээний үйлчилгээтэй байх нь тухайн хүнээс шалтгаалах ба заримд нь бага зэргийн таагүй мэдрэмж төрөх бол нөгөө хэсэг нь бараг мэдэрдэггүй тохиолдлууд бий. Тарилгын дараа хүйтэн жин тавих нь хаванг багасгах, зовууриас ангижрахад тусалдаг. Мөн тарилгаас хойш хэдэн өдрийн турш уруулын мэдрэх чадвар багасах магадлалтай гэдгийг анхаарах нь зүйтэй.

Тарилгын өмнө бэлтгэл хэрэгтэй

Энэ нь нэг их гэмгүй мэт санагдах ч тодорхой хэмжээний бэлтгэл зайлшгүй шаардлагатай. Ямар нэгэн эм, архи болон тамхины хэрэглээнээс хязгаарлах нь зүйтэй. Ингэснээр та цус өтгөрөлтөөс сэргийлэх юм.

Эсрэг заалтууд

Чихрийн шижин, цус алдалт, уруулын хомхойн хурц хэлбэрийн үрэвсэлтэй бол уруулын филлер тарилгаас татгалзах хэрэгтэй.

Гаж нөлөө

Зарим тохиолдол биеийн онцлогоос хамааран хүсээгүй үр дагаварт хүргэж болзошгүй байдаг. Тарилгын дараа хавагнадаг ч энэ нь 3-аас багагүй хоногт буух болно. Бусад гаж нөлөө:

  • Хөхрөх
  • Булдруутах
  • Уруулын хэв гажилт
  • Улайх
  • Тарилга хийгдсэн газар халдвар орох
  • Харшлах

Донтож болохгүй

Уруулын филлер шимэгддэг учраас тухайн дүр төрх удаан хадгалагдахгүй гэсэн үг юм. Иймд, шимэгдэж эхлэх үед дахин уруулаа томруулах хүсэл төрөх магадлал их байдаг. Гэвч тогтмол хийлгэх нь эрүүл мэндийн тодорхой эрсдэлүүдэд хүргэж болзошгүй учраас та шийдвэр гаргахдаа сайтар бодож үзээрэй.

Үр дүн таалагдаагүй тохиолдолд засварлах боломжтой

Хэрэв таны шинэ дүр төрх санасанд тань хүрээгүй бол эмчдээ хандан гиалуроны хүчил задлах аргаар хуучин хэвэндээ хурдан хугацаанд орох боломжтой.

Харамсалтай нь филлер тийм ч хямд биш

Одоо гоо сайхны эмнэлгүүд ашиглагдаж буй филлер болон үйлчлүүлэгчийн хүсэж буй хэмжээнээс хамаарч үнийн хэлбэлзэл ихтэй байдаг. Тарилгыг зөвхөн мэргэжлийн эмчээр л хийлгэх шаардлагатай гэдгийг анхаарна уу!

Заавал мэргэжлийн эмчид ханд

Та филлер хийлгэхээсээ өмнө өөрийн үйлчлүүлж буй эмчийн мэргэжлийн баталгааг заавал шалгах шаардлагатай. Учир нь таны нүүрний орчимд мэдрэлийн маш олон эсүүд байрладаг учир мэргэжлийн бус хүмүүсийн гарт өөрийн гоо сайхан эрүүл мэндээ даатгах нь маш эрсдэлтэй юм. Эмнэлгийн бус орчинд, ариун цэврийн шаардлага хангаагүй орчинд хийлгэж хэзээ ч болохгүй.

Эх сурвалж: edoctor.mn

Түгээх
СЭТГЭГДЭЛ ҮЛДЭЭХ

Leave a Reply

Your email address will not be published. Required fields are marked *