“Ковид-19” цар тахлын улмаас хоёр жил завсарласан “Хавдрын эсрэг үндэсний аян-2023”-г эхлүүлэхээр Хаан банк, ХСҮТ, МҮОНРТ-ийн удирдлагууд хамтын ажиллагааны санамж бичиг байгууллаа.
Энэ жил “Хавдрын эсрэг үндэсний аян” Хаан банк сангийн дэмжлэгтэйгээр Увс, Дорнод аймагт, орон нутгийн өөрсдийн дэмжлэгтэйгээр Дорноговь, Өмнөговь, Дархан-Уул, Сэлэнгэ, Завхан аймагт хэрэгжих юм.
Аяныг хэрэгжүүлсэн 10 жилийн хугацаанд ХСҮТ-ийн хавдрын нарийн мэргэжлийн эмч нарын баг 72990 км замыг туулж, Монгол Улсын бүх аймаг, дүүрэгт 2-4 удаа хүрч очин, зорилтот бүлгийн 125140 хүнд хавдрын эрт илрүүлэх урьдчилан сэргийлэх үзлэг, шинжилгээ хийж, хорт хавдрын 597 шинэ тохиолдлыг илрүүлэн оношилж шаардлагатай эмчилгээнд хамруулжээ.
Илэрсэн хорт хавдрын 40 хувь нь эмчлэгдэж болох эрт үедээ оношлогдсон нь энэхүү аяны гол үр дүн болсон бөгөөд тэдгээрийн 34 хувь нь мэс засал, 9 хувь нь хими эмчилгээ, 7 хувь нь туяа эмчилгээ, 7 хувь нь хавсарсан эмчилгээ хийлгэсэн бол 43 хувь нь орон нутагтаа хөнгөвчлөх эмчилгээнд хамрагдсан байна.
Аяны хугацаанд орон нутагт нийт 513 мэс ажилбарыг хийж, иргэдэд цаг хугацаа хэмнэсэн, чирэгдэл хүлээгдэлгүй чанартай тусламж үзүүлжээ.
Эрсдэлт бүлгийн хүн амд үзлэг оношилгоо хийхийн зэрэгцээ хавдрын тусламж үйлчилгээний төвлөрлийг сааруулах, орон нутгийн эмч мэргэжилтнүүдийг чадавхжуулах зорилгоор ажлын байрны сургалтуудыг зохион байгуулж, хорт хавдрын оношилгоо, эмчилгээнд тулгамдаж буй хүндрэл, шийдвэрлэхэд хэцүү тохиолдлуудад мэргэжлийн дэмжлэг үзүүлэн ажилласаар ирлээ.
Энэ хүрээнд 7827 эмч, эмнэлгийн мэргэжилтэнд хорт хавдрын орчин үеийн оношилгоо, эмчилгээний чиглэлээр сургалт, 2688 хүнийг сайн дурын идэвхтэн бэлтгэх сургалтад хамруулан сургажээ.
Мөн аяны тухай мэдээллийг 674 удаа хэвлэл мэдээллийн хэрэгслээр сурталчлан түгээж, хорт хавдраас урьдчилан сэргийлэх мэдээлэл сурталчилгааны материалуудыг боловсруулан 79563 ширхэгийг түгээсэн байна.
