Шинжлэх ухааны академийн Тэргүүлэгчдийн хурал өнөөдөр /2023.04.12/ хуралдаж ШУА-ийн грантаар 2023 онд хэрэгжүүлэх төслийн жагсаалтыг баталлаа. БШУЯ-наас ШУА-ийн грантыг хэрэгжүүлэхэд 100 сая төгрөг баталсан бөгөөд ШУА-ийн харьяа хүрээлэн болон бусад эрдэм шинжилгээний байгууллагуудаас нийт 33 төсөл саналаа ирүүлснээс ажлын хэсэг 18 төслийг шалгаруулж грант олгохоор болжээ.
Мөн ШУА-ийн харьяа хүрээлэнгийн захирлыг сонгон шалгаруулж томилох, чөлөөлөх журамд нэмэлт, өөрчлөлт оруулах асуудлыг хэлэлцлээ. Одоогоор ШУА-ийн гурван хүрээлэнгийн захирал түр орлон гүйцэтгэгчээр ажиллаж байгаа бөгөөд тэдгээр хүрээлэнгийн захирлыг Төрийн албаны зөвлөлөөс гаргасан шинэчлэгдсэн журмыг баримтлан сонгон шалгаруулахыг үүрэг болголоо. ШУА-ийн Биологийн хүрээлэн, Газарзүй, гео-экологийн хүрээлэн, Философийн хүрээлэнгийн эрдмийн зөвлөлийн бүрэлдэхүүнд өөрчлөлт оруулах асуудлыг хэлэлцэж баталжээ.
