“Үл таних 20-25 орчим насны хоёр эрэгтэй хүн гар утсыг нь маань дээрэмдсэн. Айлган сүрдүүлж, утасны код гаргуулан авсан. Данснаас 18.500.000 төгрөгийг авсан” гэх дуудлага мэдээлэл цагдаагийн байгууллагад энэ сарын 26-ны өдрийн 09.00 цагийн үед иржээ.
Энэ дагуу Баянгол дүүрэг дэх цагдаагийн газрын хоёрдугаар хэлтсийн алба хаагчид эрэн сурвалжлах ажиллагааг шуурхай зохион байгуулав. Шалгалтын явцад 22 настай У, 19 настай Б нар нь бүлэглэн гар утас дээрэмдэн, интернэт банкны кодыг шинээр өөрчлөн дансанд байсан мөнгийг бусдын данс руу шилжүүлэн, тээврийн хэрэгсэл худалдан авсан байв. Улмаар орон нутаг руу оргон зугтах гэж байхад нь баривчилж мөрдөн шалгах ажиллагааг үргэлжлүүлэн явуулж байна.
