Р.Чойном гуай өөрийгөө хулгана жилд төрсөн гэж бодоод шүлэг найрагтаа хэд хэдэн удаа гал хулгана жилд төрсөн хэмээн оруулсан байдаг ч он тооллоос үзэхэд цагаан сарын өмнө буюу гахай жилд төрсөн болж таарсан. Мөн тэрээр төрсөн өдөртөө зориулж, хэд хэдэн шүлэг бичсэнээс доорхи шүлгийг сонгон толилуулья.
Миний төрсөн өдрийн шүлэг
Сэргэлэн цовоо явахад хад чулуу хүртэл дуулна
Сэтгэл эмзэглэх үед гитар хүртэл уйлна
Өнгөтэй өөдтэй явахад бусдын эхнэр ч дагана
Өвдөж зовохын цагт бурхан хүртэл зугтаана
Ахархан жаргалаа хүмүүс ч зуун жил гэж эндүүрдгээс
Амьдралын хэдэн жилд зунаасаа намар нь элбэг
Өргөл ихтэй хорвоог хүн найрын ширээ шиг андуурдгаас
Өөрт нь оногдох цөөн жилд намраасаа өвөл нь элбэг
Бараан толбыг нь бодоод байвал энэ орчлон таг харанхуй
Баяр зугаагий нь дагаад байвал эргэн тойрон дандаа зун!
Мөнхийн зунаар нь цэнгэх гэвэл мөнгө болоод ухаан хэрэгтэй
Мөстэй өвөлд нь дааръя гэвэл мөрөөрөө шударга явах хэрэгтэй
Ялзрал ихтэй хорвоогийн явдал паянг нь тунгааж бичсэн нь
Яруу найрагчийн түүхэнд ганцхан би бишээ.
Тэр бүхнийг мэдсээр байж тэргэн дугуйнд нь хэрчүүлэгч
Тэсгэлгүй шүлэгчийн тоонд би бас ганцаар биш!