Улаанбаатар хотын Ерөнхий менежер бөгөөд захирагчийн ажлын албаны даргаар ахлуулсан ажлын хэсгийн бүрэлдэхүүн болон дүүргийн Засаг даргын орлогч Д.Ундармаа, холбогдох хэлтэс, албадын дарга, мэргэжилтнүүдийн хамт Нарангийн төвлөрсөн хогийн цэг, болон 2, 3 дугаар хороо, Халиа тошин үүссэн зарим хэсгүүдэд ажиллалаа.
Тодруулбал, Швейцарын хөгжлийн агентлагийн санхүүжилттэйгээр баригдаж буй Нарангийн төвлөрсөн хогийн цэг дээрх хог ангилан ялгах үйлдвэрийн техник, тоног, төхөөрөмжийн угсралт, барилгын ажилтай ажлын хэсгийнхэн танилцлаа. Үйлдвэр одоогийн байдлаар 90 гаруй хувьтай үргэлжилж байгаа бөгөөд өдөрт 10 тн хог хаягдлыг төрөлжүүлэн ангилан ялгаж, үйлдвэрийн бүтээгдэхүүн болгон гаргах юм.
Тус үйлдвэрт Сонгинохайрхан дүүргийн 2, 3 дугаар хорооны өрхүүдийн ангилсан хог хаягдлаас гадна Нийслэлийн төвийн бусад дүүргийн ангилсан хог хаягдлууд зөөвөрлөгдөн ирж боловсруулагдана.
Мөн Нарангийн төвлөрсөн хогийн цэг дээр дараагийн хог хаягдал ангилах үйлдвэр болох “УЛААНБААТАР ХОТЫН ХҮНСНИЙ ХАЯГДАЛ ДАХИН БОЛОВСРУУЛАХ ҮЙЛДВЭР” барих төслийг хэрэгжүүлэхээр судалгааны ажил явагдаж байна.
Сонгинохайрхан дүүрэг нь өнгөрсөн онд хог хаягдлыг ангилан хаях соёлыг нэвтрүүлэхээр Швейцарын хөгжлийн агентлагийн санхүүжилттэйгээр ангилан ялгах зориулалтын хогийн савыг 2,3 дугаар хорооны 500 өрхөд байршуулсан. Эдгээр хог хаягдал ангилан ялгах анхан шатны тээвэрлэлтэд бэлтгэх ажлыг нэвтрүүлсэн 2, 3 дугаар хорооны оршин суугчдын төлөөлөлтэй уулзлаа. Тус хорооны иргэдийн хогийг тусгай зориулалтын автомашин ирж ачдаг бөгөөд утсан дээрх суурилуулсан апплекшнаараа хогны машиныг хэзээ ирэх, хаана явж байгааг иргэд харах боломжтой болсноороо энэ төслийн онцлог юм.
