Та өдрийн 24 цагт хийнэ гэсэн ажлуудаа бүрэн амжуулж, төлөвлөсөн зүйлсээ хангалттай хийж чаддаг уу? Ихэнх хүмүүс үүнд итгэлтэйгээр тийм гэж хариулж чаддаггүй. Гэхдээ нэгэнт л өдрийг 28 цаг болгон сунгах боломжгүй тул байгаа 24 цагаасаа хэрхэн чөлөөт цаг гаргаж болох зөвлөгөөг хүргэе.
Хэрэггүй зүйлсээ таних
Онцын шаардлагагүй бол facebook, instagram, twitter гэх зэргийг байнгын шалгаж, ухахгүй байвал танд цаг зав гарна гэдэгт итгэлтэй байна. Мөн чухал биш уулзалтууд, хэрэгцээгүй апп гээд ихэнх нь үнэн хэрэгтээ тийм ч шаардлагатай биш бөгөөд бидний цаг хугацаанаас “хумсалж” байдаг.
Өөрийгөө чөлөөлж сурах
Өөртөө чөлөөт цаг гаргах дараагийн арга бол үүрэг хариуцлагынхаа тодорхой хувийг бусдад шилжүүлэх. Би л үүнийг хийх ёстой, надаас өөр хүн чадахгүй гээд л өөртөө хэт их ачаа, дарамт өгөх нь эргээд танд тийм ч сайн зүйл авчрахгүй. Харин үүний оронд хамт ажиллагсад, туслахуудынхаа дунд үүрэг даалгавраа дахин хуваарилж мөн гэрийн ажлаа ч гэр бүлийн гишүүдтэйгээ тэнцүү хувааж аваарай. Магадгүй тэд зарим нэг даалгавруудыг танаас ч илүү сайн биелүүлж болох юм.
Багаас эхлэх
Хэрэв та ямар нэг зүйлээс бүрэн татгалзаж чадахгүй байвал бага багаар оролдоод үзээрэй. Угаасаа л өнөөдөр гэнэт амжилтад хүрч чадахгүй шүү дээ. Жишээ нь өдөр бүр 30 минутыг чөлөөлснөөр та долоо хоногт 3,5 цаг, сард 14 цагийг илүү гаргах бөгөөд энэхүү чөлөөт цагаа хобби, сонирхол, амралтдаа зориулж болно.
Өөртөө чөлөө зав гаргах аялалд тань амжилт хүсье.
