Монгол Улсын Ерөнхийлөгч У.Хүрэлсүх Бүгд Найрамдах Казахстан улсын Астана хотод төрийн айлчлал хийж байгаа билээ. Энэ үеэр манай улсын Ерөнхийлөгчийг угтах ёслолыг сурвалжлахаар тус орны ерөнхийлөгчийн Акорда өргөөнд хөл тавих завшаан тохиов. Завшаан гэсэн нь учиртай. Бид өргөө рүү нэвтрэхийн тулд хэд хэдэн давхар хамгаалалт давсан бөгөөд хаалгаар ороход хүн бүрийн пасспортыг царайтай тулган нарийн шалгах нь хилээр гарч буй үеийн уур амьсгалтай ижил. Буутай цэрэг, танк шиг том бөгөөд бүрэн тоноглогдсон том машинууд, автобус тойруулан шалгах мэдрэгчтэй төхөөрөмж. Энэ бүгдийг харахад төрийн айлчлалын өндөр зохион байгуулалтаас өөр хубилбараар Акорда өргөөний босгыг давах ярвигтай бололтой.
Монгол Улсын хувьд төрийн ажлаа Улаанбаатар хотын төв, Чингисийн талбайн хойно байрлах саарал ордонд хэлэлцдэг. Тусдаа ерөнхийлөгчийн ордон гэж байдаггүй болохоор Акорда өргөөг харьцуулж харахад сонирхолтой байв. Манай улсын хувьд гаднаас ирсэн зочдод төрийн ордны урд улаан хивс дэвсэж хүндэтгэл үзүүлдэг шүү дээ. Хивсийг талбайн пилтан дээр гар аргаар наадаг. Хэрэв салхи шуурч, бороо асгарвал айлчлал бүтэлгүйтэх учраас арга хэмжээ дуусан дуустал албаны улсын амьсгаа дээр явдагийг салбарын хүнээс сонсож байлаа. Ингээд бодохоор манай улсад зун эсвэл хаврын адаг, намрын эхэн сард л төрийн айлчлал хүлээн авах боломжтой юмуу даа. Монголын хаврын салхи, намрын сэрүү, өвлийн жавартайд талбай хөндлөн алхахад бүр ч илүү хүйтэн байх шиг санагддаг сан. Тэгэхээр манай улс руу ирэх төлөөлөгчид онгоцноос буугаад л эрс, тэрс уур амьсгалтай нүүр тулдаг байх нь ээ..
Бүгд Найрамдах Казахстан Улсын нийслэл Астана хотын төвд байрлах Ерөнхийлөгчийн “Акорда” өргөө 2004 онд ашиглалтад оржээ. Хотын дундуур урсах “Есиль” /Ишим/ голын зүүн талд Байтерек цамхаг, Дээд шүүх, Парламентын ордон, Засгийн газрын ордон зэрэгцэн оршдог. “Акорда”-д Ерөнхийлөгчийн Тамгын газар болон ажлын алба байрладаг. “Акорда” нь монголоор “Цагаан ордон” гэсэн үг. Өргөөний оройн Казахстан улсын далбааны цэнхэр өнгийн бөмбөлөг мөнх хөх тэнгэрийг бэлгэддэг. Орой дээрээ нарны цацраг бүхий гэрийн тооно, бүргэдийн дүрсийг байрлуулж өгсөн нь эрх чөлөө, тусгаар тогтнол, энх тайван, ард түмний эв нэгдлийг илэрхийлдэг ажээ.
“Акорда” өргөөг Бүгд Найрамдах Казахстан Улсын төрт ёс, тусгаар тогтнолын илэрхийлэл хэмээдэг.
“Акорда” өргөөний нийт талбай нь 36,720 м2, өндөр нь 86 метр, долоон давхар бүтээн байгуулалт юм. Гантиг танхим, Алтан танхим, Зууван танхим, Дорнын танхим, Зочдын танхим, Өргөтгөсөн хэлэлцээрийн танхим, Аюулгүй байдлын зөвлөлийн хуралдааны танхим зэрэг 12 өрөө тасалгаатай. Мөн номын сан болон гаднаа цэцэрлэгт хүрээлэнтэй.
Акордо өргөө нь музей эсвэл сүм гэж хэлж болохуйц тансаг хийцлэлтэй. Барилгын гадна болон дотоод засал чимэглэлд цагаан болон цайвар өнгө давамгайлжээ. Хүндэтгэлийн хивсний өнгө л цэнхэр. Түүнээс бусдаар цагаан, шар, шаргал, алтлаг шаргал өнгөний зохицлыг урлагийн бүтээл гэж хэлэхээр хэмжээнд нүд алдам харуулжээ. Барилга байгууламжийн төслийн ажлыг Европ болон Казахстаны архитекторуудын оролцоотой хийж гүйцэтгэсэн бөгөөд үндэсний хэв маягийг агуулсан дотоод заслыг ЗХУ-ын Ардын архитектор, академич К.Монтахаев гаргасан байна.
Өргөөний давхар бүрд хамгаалалтын ажилтантай. Нэг давхарт зураг дарж, бичлэг хийхийг зөвшөөрдөг ч бусад хэсэгт хориотой байв.
Бүгд Найрамдах Казахстан улсын төрийн хүндэт харуул, үлээвэр найрал хөгжим хоёр улсын төрийн тэргүүнд хүндэтгэл үзүүлэв. Түүний араас үлээвэр найрал хөгжим Монгол Улсын төрийн дууллыг тоглож эхлэхэд өргөөнд байгаа монголчуудын гар зүрхэн тушаа байрлав. Үргэлжлүүлэн, Бүгд Найрамдах Казахстан улсын төрийн дуулал эгшиглэхэд өргөөнд байгаа казахуудын гар зүрхэн тушаа байрлав. Ёслолын үйл ажиллагааны яг энэ агшинд өөрийн орны төрийн дуулал, тусгаар тогтнол, өв соёлоор бахархах сэтгэл төрлөө.
Монгол Улсын Ерөнхийлөгч У.Хүрэлсүхийн Казахстан улсад хийсэн төрийн айлчлалын үр дүнг цөөн үгээр:
1. Улаанбаатар-Астана чиглэлд Казахстаны авиа компани “Cкат” шууд нислэг үйлдэнэ.
2. Монгол улс 1 сая тонн газрын тос Казахстан улсаас худалдан авна.
3. Хоёр улс хооронд дөт маршрут бүхий авто зам барина.
4. Баян-Өлгий аймагт Казахстаны консулын газар нээхийг дэмжинэ.
5. Монгол улс мах, ноос ноолуур, арьс ширэн бүтээгдэхүүн нийлүүлнэ.
6. Казахстан улсаас жимс жимсгэнэ, сайн чанарын улаан буудай худалдан авна.
