НҮБ-ын энхийг сахиулах “UNMISS” ажиллагаанд үүрэг гүйцэтгэж байгаа Монгол Улсын Зэвсэгт хүчний 11 дүгээр ээлжийн цэргийн баг, тус ажиллагаанд үүрэг гүйцэтгэх 12 дугаар ээлжийн цэргийн багийн бие бүрэлдэхүүний ээлж солилцох ажлыг зохион байгуулах Хөдөлгөөний хяналтын ажилтан Томас Андрью Ланго Хиссэн (Thomas Andrew Lango Hissen) өнөөдөр Зэвсэгт хүчний Жанжин штабт айлчиллаа.
Түүнийг ЗХЖШ-ын орлогч дарга хурандаа Т.Галбадрах, Ажиллагааны удирдлагын газрын дарга бригадын генерал С.Дашзэвэг нар хүлээн авч уулзав. Уулзалтын үеэр НҮБ-ын төлөөлөгч, цэргийн баг солилцох үйл ажиллагааны хяналт, аюулгүй байдлын мэргэжилтэн Томас Хиссэн хэлсэн үгэндээ “Монгол Улсад буухад маш хүйтэн байлаа. Хэдий тийм ч хошууч Г.Золбадрах дулаан хувцас бэлтгэн ирж найрсгаар угтан авсанд талархаж байна. Хоёр ээлжийн бүрэлдэхүүнийг солилцох үйл ажиллагаа мэргэжлийн өндөр түвшинд маш сайн зохион байгуулалттай боллоо. Дараагийн гурван нислэг мөн өндөр түвшинд зохион байгуулагдана гэдэгт итгэлтэй байна. Монгол Улсын цэргүүд БНӨСУ-д үүргээ гайхалтай сайн биелүүлж, дэлхийд энхтайвныг тогтоож байгаа. Тиймээс хамгийн шилдэг шалгарсан офицеруудаа илгээж буй Монгол Улсын Зэвсэгт хүчинд талархаж байна” хэмээсэн аж.
Эх сурвалж: ЗХЖШ
