Өнгө гэдэг зүйл бидний өдөр тутмын амьдралд өөрийн чухал нөлөөг үргэлж үзүүлж байдаг. Тэгвэл бага насны хүүхдэд энэ нь бүр ч илүү хамааралтай ба хэт их хөдөлгөөнтэй, анхаарал төвлөрөл муутай, хүүхдүүдийн сэтгэл зүй, анхаарал төвлөрөлтөд тод өнгөнүүд нэлээд сөрөг нөлөөлөл үзүүлэх нь элбэг байдаг учир анги танхим болоод өрөөнд нь аль болох завсрын, зөөлөн өнгө сонгохыг мэргэжилтнүүд зөвлөдөг байна.
УЛБАР ШАР
Улбар шар өнгийг хүүхдийн санах ойг нэмэгдүүлж, шүүмжлэлт сэтгэлгээг сайжруулдаг гэж тодорхойлдог. Тийм ч учраас шалгалтын өрөөнд улбар шар өнгийг голчлон ашигласнаар оролцогчдын шалгалтын гүйцэтгэлийг сайжруулдаг хэмээн үздэг. Үүгээр ч зогсохгүй хүүхдийн бие даасан байдал, өөртөө итгэх итгэлийг нэмэгдүүлэхэд тусалдаг хэдий ч энэхүү өнгө бусад өнгөнүүдтэй харьцуулахад тун бага ашиглагддаг байна.
НОГООН
Энэхүү өнгө нь хүүхдийн анхаарал төвлөрөлтийг нэмэгдүүлж, уншиж ойлгох чадварыг сайжруулж өгдөг. Мөн ногоон өнгийг ашиглан байгальд ойр мэдрэмжийг төрүүлэх, эрүүл, эко орчныг бүрдүүлж өгөх нь хүүхдийн сэтгэл зүйг тайван байхад тусалдаг байна.
ЯГААН
Ягаан өнгө нь хүүхдийг аз жаргалтай болгодгоос гадна бусдыг өрөвдөх, энэрэх мэдрэмжийг төрүүлдэг өнгө юм. Охид ягаан өнгөнд илүүтэйгээр татагддаг шалтгаан бол энэхүү өнгө нь эмэгтэй хүний эрч хүч, сайхан сэтгэлийг өдөөж, аз жаргалын дааврыг илүүтэйгээр ялгаруулж өгдөгт оршино.
ЦЭНХЭР
Цэнхэр өнгө нь хүүхдэд тайван, амгалан орчин бүрдүүлж өгдгөөс гадна бүтээлч байдлыг нэмэгдүүлэхэд тусалдаг. Гэвч нэг дор хэт их цэнхэр өнгө хэрэглэх нь хүүхдийг уйтгар гунигт автуулж, сэтгэлээр унах мэдрэмжийг төрүүлэх эрсдэлтэй байдаг тул нийцэх бусад өнгөнүүдтэй хослуулан хэрэглэх чухал.
