Автомашин, мотоцикл, барилга угсралт, үйлдвэрлэл, үзвэр үйлчилгээний газраас үүдэлтэй өдөр, шөнөгүй гарах хэт чанга дуу чимээ нь хүний тав тухыг алдагдуулаад зогсохгүй эрүүл мэнд, амьдралын чанарт сөргөөр нөлөөлдөг гэж олон улсад үздэг.
Иймээс иргэдийн эрүүл, амгалан тайван орчинд ажиллаж, амьдрах эрхийг хангах зорилгоор Дуу чимээний бохирдлын тухай анхдагч хуулийн төслийг санаачлан боловсруулж дууслаа.
Хуулийн төсөлд:
• Дуу чимээний бохирдлоос урьдчилан сэргийлэх
• Дуу чимээний бохирдлын зөвшөөрөгдөх дээд хэмжээг бүсчлэн тогтоох
• Дуу чимээ үүсгэгч эх үүсвэрийг тодорхойлж, түүний үйл ажиллагаанд тавих шаардлагыг хуульчлах
• Иргэн, хуулийн этгээд, төрийн байгууллагын эрх үүрэг, хяналт, хариуцлагын тогтолцоог боловсронгуй болгох зэрэг зохицуулалтыг тусгаад байна.
Дэлхийн олон улс дуу чимээний бохирдлыг хүний эрүүл мэндэд сөргөөр нөлөөлөх хүрээлэн буй орчны томоохон эрсдэл гэж үзэн тусгайлсан хууль, эрх зүйн зохицуулалтыг хэрэгжүүлдэг.
Харин манай улсад дуу чимээний зөвшөөрөгдөх хэмжээг тогтоосон стандартууд мөрдөгдөж байгаа ч тэдгээр нь техникийн шаардлагаар хязгаарлагдаж, хэрэгжилт, хариуцлагын нэгдсэн тогтолцоо хангалтгүй байгаа юм.
Иймд хуулийн төслийг илүү бодит, иргэдийн хэрэгцээнд нийцсэн болгохын тулд удахгүй олон нийтийн хэлэлцүүлэг зохион байгуулж, иргэд, мэргэжлийн байгууллага, судлаачдын саналыг өргөн хүрээнд авах болно.
