Дэлхийн хамгийн өндөр барилгуудад авирдгаараа алдартай Иван Бееркус болон Анжела Николау АНУ-ын Нью-Йорк хотын бэлгэ тэмдэг болсон Empire State Building-ийн антенны оройд зөвшөөрөлгүйгээр авирч, дэлхий дахинд энх тайвныг уриалсан туг мандуулан олны анхаарлыг татлаа.
Хосууд хотын гудамжнаас ойролцоогоор 443 метрийн өндөрт байрлах антенны үзүүрт гарч, “When the power of love beats the love of power, the world knows peace” буюу “Хайрын хүч эрх мэдлийн хүслийг давсан цагт дэлхий энх тайвныг мэдэрнэ” гэсэн бичигтэй тугийг дэлгэсэн байна.
Энэхүү эрсдэлтэй үзүүлбэр зөвхөн энх тайвны уриалга байгаагүй юм. Нью-Йоркийн цагдаагийн газрын мэдээлснээр, хосууд барилгын оройд байх үеэр Иван Бееркус Анжела Николауд гэрлэх санал тавьж, бүсгүй зөвшөөрсөн байна.
Тэд өмнө нь 2022 онд Малайзын 679 метр өндөр Merdeka 118 цамхагийн оройд мөн авирч байсан бөгөөд энэ нь дэлхийн хамгийн өндөр барилгуудын нэг юм.
Харин Empire State Building дээрх үзүүлбэрийн дараа Нью-Йоркийн цагдаагийн газар хосуудыг баривчилж, хууль бусаар нэвтэрсэн болон олон нийтийн аюулгүй байдалд эрсдэл учруулсан зэрэг үндэслэлээр хэрэг үүсгэн шалгаж эхэлжээ.
