Загварын ертөнцөд асар том хөрөнгө оруулалт, олон арван жилийн түүхгүйгээр дэлхийн хэмжээний брэнд босгоно гэдэг бараг боломжгүй мэт. Гэвч Францын залуу дизайнер Симон Порт Жакмюс энэ ойлголтыг өөрчилсөн юм. Тэрбээр 19 настайдаа үүсгэн байгуулсан Jacquemus брэндээ ердөө хэдхэн жилийн дотор дэлхийн хамгийн нөлөө бүхий загварын брэндүүдийн нэг болгож чадсан билээ.
Өнөөдөр Jacquemus бол зөвхөн хувцас биш. Энэ бол Францын өмнөд нутгийн нарлаг уур амьсгал, эрх чөлөө, романтик мэдрэмж, минималист тансаг байдлыг илэрхийлдэг соёлын үзэгдэл болсон юм.
Симон өсвөр наснаасаа эхлэн загварт дурлаж, Парист очин нэр хүндтэй загварын сургуульд элсэн оржээ. Гэвч удалгүй тэр уламжлалт боловсролоос илүү өөрийн төсөөлөлдөө итгэхээр шийдэж сургуулиа орхижээ. Ийнхүү ердөө 19 настайдаа өөрийн брэндийг байгуулсан байна.
Тухайн үед түүнд том хөрөнгө оруулагч, алдартнуудын дэмжлэг, загварын ертөнцийн холбоо сүлбээ байсангүй. Харин өөрийн мөрөөдөл, бүтээлч сэтгэлгээ, өвөрмөц харах өнцөг л байв.
Гэвч түүний амьдралд хамгийн том нөлөө үзүүлсэн хүн бол ээж нь байлаа. 2009 онд Симоны ээж Валери автомашины ослоор харамсалтайгаар нас баржээ. Энэ үйл явдал түүний амьдралыг эрс өөрчилсөн бөгөөд Симон ээжийнхээ дурсгалыг мөнхжүүлэхийн тулд шинээр байгуулсан брэндээ ээжийнхээ овгоор нэрлэхээр шийдсэн байна. Ингэж л та бидний мэдэх Jacquemus хэмээх нэр мэндэлжээ.
Одоо ч Симон ярилцлага бүртээ ээжийгээ өөрийн хамгийн том урам зориг хэмээн дурсдаг. Түүний хэлснээр Jacquemus бол зөвхөн загварын брэнд биш харин ээждээ зориулсан хайрын захидал юм. Магадгүй энэ л шалтгаанаар Jacquemus-ийн бүтээлүүдэд бусад тансаг брэндүүдэд тэр бүр байдаггүй дулаан мэдрэмж байдаг биз ээ.
Олон тансаг брэндүүд сүр хүч, эрх мэдэл, дээд зэрэглэлийн амьдралын хэв маягийг сурталчилдаг бол Jacquemus нар, дулаан өнгө, байгалийн гоо үзэсгэлэн, энгийн байдал, эрх чөлөө баяр баясгаланг илэрхийлдэг. Тиймээс Jacquemus-ийн цуглуулгыг харахад хэтэрхий төвөгтэй эсвэл сүржин харагддаггүй. Харин амралт, аялал, нарлаг өдөр, далайн эргийн романтик мэдрэмжийг төрүүлдэг.
Le Chiquito: Дэлхийг шуугиулсан хамгийн жижиг цүнх
2018 онд Jacquemus загварын түүхэн дэх хамгийн алдартай бүтээгдэхүүнүүдийн нэг болох Le Chiquito цүнхийг танилцуулжээ. Энэ цүнх маш жижиг хэмжээтэй байсан бөгөөд гар утас ч багтахгүй, заримд нь уруулын будаг ч арай гэж ордог байв. Гэсэн ч хүмүүс яг энэ өвөрмөц байдлыг нь үнэлж, Le Chiquito богино хугацаанд дэлхийн хамгийн их яригдсан цүнх болж чадсан юм. Өнөөдөр уг цүнх брэндийн бэлгэ тэмдэг болсон хэвээр байна.
Лаванда цэцгийн талбай дахь домогт шоу
2019 онд брэндийн 10 жилийн ойд зориулсан шоу Францын Прованс дахь лаванда цэцгийн талбайн дунд болсон юм. Нил ягаан талбайн голоор урт ягаан тайз тавьж, моделиуд алхсан нь загварын ертөнцийг шуугиулжээ. Энэ шоуны зургууд олон сая удаа хуваалцагдаж, Jacquemus-ийн нэрийг дэлхийн хэмжээний брэнд болгосон гэж үздэг.
Том малгайны трендийг эхлүүлсэн нь
Le Chiquito-оос гадна Jacquemus-ийн бас нэг алдартай бүтээл бол асар том сүрлэн малгай юм. Зарим малгай нь эзнийхээ мөрнөөс ч том хэмжээтэй байв. Загварын хувьд практик биш мэт харагддаг ч энэ нь брэндийн гол зарчим болох “Загвар хөгжилтэй байх ёстой” гэсэн үзлийг илэрхийлдэг.
Мэдээж Jacquemus-ийн амжилтыг зөвхөн Le Chiquito цүнх, аварга сүрлэн малгайгаар хэмжих боломжгүй. Загвар шүүмжлэгчид болон салбарын мэргэжилтнүүдийн үздэгээр тус брэндийн хамгийн том гавьяа нь орчин үеийн люкс загварын ертөнцийн тогтсон дүрмийг өөрчилсөнд оршдог.
2000-аад оны эхэн үеийн загварын ертөнцийг Louis Vuitton, Gucci, Dior зэрэг аварга корпорацууд тодорхойлж байлаа. Тансаг зэрэглэлийн брэнд гэдэг асар том төсөвтэй шоу, дэлхийн хэмжээний сурталчилгаа, олон арван жилийн түүхтэй байх ёстой мэт ойлголт давамгайлж байсан үе. Харин Симон Порт Жакмюс үүний эсрэг замыг сонгосон юм.
Тэрбээр Парисын ордон, музейд шоу зохион байгуулахын оронд хүүхэд насных нь дурсамж шингэсэн Провансын лаванда цэцгийн талбайг сонгов. Сая сая еврогийн сурталчилгааны төсвийн оронд Instagram-ын хүчийг ашиглаж, загварын шоуг зөвхөн мэргэжлийн хүрээнийхэн бус дэлхий даяарх хэрэглэгчдэд зориулсан визуал туршлага болгон хувиргасан юм. Ингэснээр Jacquemus нь сошиал медиа эрин үед өсөж, дэлхийд танигдсан анхны амжилттай люкс брэндүүдийн нэг болсон билээ.
