Электрон тамхи буюу вэйпийн эрүүл мэндэд үзүүлэх нөлөөний талаар сүүлийн жилүүдэд олон судалгаа хийгдэж байгаа. Австралийн судлаачдын удирдсан шинэ судалгаагаар никотин агуулсан вэйп нь уушги болон амны хөндийн хорт хавдар үүсэх эрсдэлтэй холбоотой байж болзошгүй гэсэн дүгнэлтэд хүрчээ.
Судлаачид 2017-2025 оны хооронд хэвлэгдсэн лабораторийн туршилт, амьтан дээрх судалгаа, хүний биомаркерын судалгаа болон эмнэлзүйн мэдээллүүдийг нэгтгэн шинжилсэн байна. Үр дүнд нь вэйпийн аэрозол нь ДНХ-ийн гэмтэл, исэлдэлтийн стресс, архаг үрэвсэл зэрэг хорт хавдар үүсэхтэй холбоотой биологийн өөрчлөлтүүдийг өдөөж болохыг тогтоожээ.
Мөн 2025 онд хэвлэгдсэн системчилсэн тойм судалгаагаар электрон тамхины хэрэглээ нь хорт хавдрын эрсдэлийг илтгэх биомаркеруудтай холбоотой болох талаар нэлээд хэмжээний нотолгоо хуримтлагдсан гэж дүгнэсэн байна. Гэхдээ хүний урт хугацааны ажиглалтын судалгаа одоогоор хангалтгүй хэвээр байгаа тул эрсдэлийн хэмжээг бүрэн тогтоохын тулд нэмэлт судалгаа шаардлагатай гэжээ.
Өөр нэг судалгаагаар вэйп хэрэглэгчдийн амны хөндийн эсүүдэд илэрсэн ДНХ-ийн гэмтлийн түвшин нь уламжлалт тамхи татдаг хүмүүсийнхтэй төстэй бөгөөд огт хэрэглэдэггүй хүмүүсээс хоёр дахин өндөр байгааг тогтоосон байна. Иймд эрдэмтэд “тамхинаас харьцангуй бага хор нөлөөтэй” гэх ойлголтыг “аюулгүй” гэсэн ойлголттой андуурч болохгүйг анхааруулж байна.
