Зургаан сар завсарласан НӨАТ-ын сугалааны тохирол өчигдөр буюу 2022 оны аравдугаар сарын 12-нд явагдсан. Сугалааны тохирлоор 36,499 баримтад хонжвор таараад байгаа. Эдгээр азтан болсон иргэдийн урамшууллыг ямар хугацаанд олгох талаар Татварын Ерөнхий Газрын НӨАТ-ын хэлтсийн дарга Д.Мөнхтуулаас тодрууллаа.
– НӨАТ-ын сугалаанд азтан болсон иргэдийн урамшууллыг хэзээ олгох вэ?
– Азтан болсон иргэд Ebarimt аппликэйшны СУГАЛАА цэс рүү орж, хонжвор шалгах товчлуур дээр дарж урамшууллаа баталгаажуулна. Баталгаажуулалт хийснээр Татварын Ерөнхий Газар хүсэлтийг хүлээн авсан гэсэн үг. Хүсэлтийг татварын байгууллага шалгаж баталгаажуулаад ажлын 15 хоногт урамшууллыг системд бүртгэлтэй данс руу нь шилжүүлнэ. Өөрөөр хэлбэл азтан болсон иргэн урамшууллаа баталгаажуулсан өдрөөс хойш ажлын 15 хоногт олгоно.
Урамшууллаа сугалааны тохирол явагдсанаас хойш 90 хоногийн дотор баталгаажуулах эрхтэй байдаг. Баталгаажуулахгүй 90 хоногоос хэтэрвэл цуцлагдах журамтай.
– Сугалааны тохирлын урамшууллын хэмжээ болон өсөлтийн хувийн нэмэгдлийн тухайд?
– Сугалааны тохирлоор хамгийн багадаа төлбөрийн 1-10 баримт бүртгүүлээд гурван орон таарсан бол 30,000 төгрөг хожно. Тухайн хонжвор таарсан төлбөрийн баримт нь аль аймаг, дүүргийн нутаг дэвсгэр дээрээс хэвлэгдсэнээс хамаараад өсөлтийн хувиар нэмэгдэх зохицуулалттай.
Өөрөөр хэлбэл 30,000 төгрөг хожсон бол үүн дээр өсөлтийн хувь нэмэгдээд 30,000 төгрөгөөс дээш болно.
Супер азтан мөн адил нэг, хоёр, гуравдугаар зэргийн ангиллаас хамаараад өсөлтийн хувиар нэмэгдэнэ. Нэгдүгээр ангиллын супер азтаны урамшууллын дээд хэмжээ 30 сая төгрөг бөгөөд үүн дээр өсөлтийн хувиар нэмэгдэнэ.
Тодруулбал гуравдугаар ангиллын буюу 1-10 баримт бүртгүүлээд 8 орон таарвал супер азтан таван сая, хоёрдугаар ангиллын буюу 11-50 баримт бүртгүүлээд 8 орон таарвал 10 сая, нэгдүгээр ангиллын буюу 51-ээс дээш баримт бүртгүүлээд 8 орон таарвал 30 сая төгрөг хожих хязгаартай.
Азтан болсон иргэнд өсөлтийн хувийг 2022 оны есдүгээр сарын төлбөрийн баримтын хэвлэлтийн мэдээг 2021 оны есдүгээр сарынхтай харьцуулаад нэмж өгч байгаа. Өсөлтийн хувийн нэмэгдэл дээд тал нь 100% хүртэл байх зохицуулалттай.
