Аргентины супер од Лионел Месси албан ёсоор тэрбумтнуудын эгнээнд бичигдлээ.
Bloomberg-ийн тооцооллоор түүний нийт хөрөнгө 1 тэрбум ам.долларыг давсан бөгөөд ингэснээр Криштиану Роналдугийн дараах “тэрбумтан хөлбөмбөгчин” боллоо.
Месси 2007 оноос хойш цалин, шагнал, ивээн тэтгэгчдийн гэрээнээс 700 сая гаруй ам.долларын орлого олжээ. Харин түүний хөрөнгийн өсөлтөд хамгийн том нөлөө үзүүлсэн алхам нь “Интер Майами”-д нэгдсэн шийдвэр байв.
2022 оны ДАШТ-д түрүүлсний дараа түүнд Саудын Арабын клубээс жилд 400 сая ам.долларын санал ирсэн ч Месси АНУ-ыг сонгосон. Түүний “Интер Майами”-тай байгуулсан гэрээ нь зөвхөн цалингаар хязгаарлагдаагүй бөгөөд Apple TV-ийн MLS Season Pass, Adidas-ийн орлогоос хувь хүртэх онцгой нөхцөлүүдийг багтаасан юм.
Месси MLS-д ирснээр “Интер Майами”-гийн үнэлгээ огцом өсөж, Apple TV-ийн MLS Season Pass үйлчилгээний захиалагчид ч эрс нэмэгдсэн байна.
Хөлбөмбөгийн талбай дээрх домог ийнхүү спортын бизнесийн ертөнцөд ч шинэ түүх бичиж эхэллээ.
