Хааны Ордон музей түүх, соёлын өвийг олон нийтэд сурталчлах, боловсролын үйл ажиллагаагаа өргөжүүлэх зорилготой “Хаан ордны хавар 2026” тусгай хөтөлбөрийн нээлттэй өдрүүдээ зарлалаа.
Тус арга хэмжээ 2026 оны тавдугаар сарын 18–28-ны хооронд үргэлжлэх бөгөөд энэ хугацаанд үзэсгэлэн, урлагийн тоглолт, боловсролын хөтөлбөр зэрэг олон төрлийн үйл ажиллагаа зохион байгуулна.
Хөтөлбөрийн хүрээнд “Энэрэхүйн хүч” үзэсгэлэн тавдугаар сарын 18-наас 28-ны өдрүүдэд дэлгэгдэх бол нээлтийн өдөр болох 18-нд “Веган хоолны өдөрлөг”, урлагийн тоглолт зэрэг арга хэмжээ болно.
Мөн нээлттэй өдрүүдийн турш музейн танин мэдэхүйн агуулгатай боловсролын хөтөлбөрүүд хэрэгжиж, үзэгчдэд илүү өргөн хүрээний соёлын туршлага хүргэхээр төлөвлөжээ.
Энэ үеэр тасалбарын тусгай хөнгөлөлт үйлчлэх бөгөөд өндөр настан, тусгай хэрэгцээт иргэд, 0–16 насны хүүхдүүд музейг үнэ төлбөргүй үзэх боломжтой. Харин насанд хүрэгчид болон оюутнууд 50 хувийн хөнгөлөлттэй үнээр үйлчлүүлэх юм.
