Дэлхийн эдийн засгийн форум болон Deloitte-ийн 2025 оны ОУ-ын судалгаануудад миллениалууд болон “Z” үеийнхэн зөвхөн өндөр цалинтай ажил биш, өөрийн үнэт зүйлтэй нийцсэн, утга учиртай ажил хийхийг илүү чухалчилдаг болсон талаар онцолжээ.
Судалгаанд оролцсон залуусын хувьд ажил гэдэг нь зөвхөн орлого олох хэрэгсэл биш, харин нийгэмд ямар нөлөө үзүүлж байгаа, өөрийг нь хэр хүндэлж байгаа, ямар орчинд ажиллаж байгаа болон тухайн ажил нь өөрт нь хэр утга учиртай санагдаж байгаатай илүү холбоотой болсон байна.
Мөн миллениалууд болон “Z” үеийнхэн сэтгэлзүйн эрүүл мэндийг дэмждэг байгууллага, уян хатан ажлын цаг, хүнийг хүндэлдэг ажлын соёл, хувь хүний өсөлтийг дэмждэг орчинд илүү ач холбогдол өгдөг талаар дурджээ.
Судлаачдын үзэж буйгаар энэ хандлага нь цар тахлын дараах амьдралын үнэлэмжийн өөрчлөлт, ажлын байрны стресс, сэтгэлзүйн асуудал болон цахим орчны дарамттай холбоотой аж.
Түүнчлэн өнөөгийн залуус өмнөх үеийнхнээс илүү ажлаа солих, хэт дарамттай ажлын орчноос гарах, ажлынхаа утга учрыг эрэлхийлэх хандлагатай болсон талаар хөдөлмөрийн зах зээлийн судалгаанууд онцолжээ.
Ингэснээр “амжилттай ажил” гэх ойлголт зөвхөн өндөр цалин бус амьдралын чанар, сэтгэл ханамж, хувь хүний үнэ цэнтэй илүү холбоотой болж эхэлж байна.
