АНУ-ын Кино урлаг, шинжлэх ухааны академи “Оскар” шагналын дүрэмд өөрчлөлт оруулснаа мэдэгдлээ. Энэхүү шинэчлэл нь кино урлагт хиймэл оюуны оролцоог хэрхэн үнэлэхийг тодорхой болгох зорилготой аж.
Үүнд: “Гадаад хэлээрх шилдэг кино” төрөлд нэр дэвших журамд өөрчлөлт оржээ. Хэрэв тухайн бүтээл Берлиний кино наадам, Каннын кино наадам зэрэг олон улсын наадмуудаас шагнал хүртсэн бол нэг улс эсвэл бүс нутгаас хэд хэдэн бүтээл нэр дэвших боломжтой болжээ. Өмнө нь зөвхөн тухайн улсын дотоод шалгаруулалтаар сонгогдсон нэг бүтээлийг оролцуулдаг байсан нь зарим уран бүтээлчдэд шударга бус байсан гэжээ.
Мөн нэг жүжигчин нэг төрөлд хэд хэдэн дүрээр нэр дэвших боломжтой болжээ. Өмнө нь зөвхөн нэг дүрээр нэр дэвшдэг байсан юм.
Харин кино зохиолын хувьд зохиогчийн эрхийг чухалчилсан шаардлага хэвээр байна. Зохиолыг заавал хүн бичсэн байх ёстой бөгөөд хиймэл оюуны хэрэгслүүд нь шагналд нэр дэвших боломжид шууд нөлөөлөхгүй гэж академи мэдэгдсэн байна. Маргаантай тохиолдолд кино бүтээгчдээс нэмэлт мэдээлэл шаардах аж.
Үүнээс гадна хиймэл оюунаар бүтээсэн “жүжигчид”-ийн тухайд тодорхой хориг тавигджээ. Академийн шийдвэрээр AI ашиглан бүтээсэн дүрүүд шагналд нэр дэвших эрхгүй болсон бөгөөд зөвхөн тухайн хүний зөвшөөрөл баталгаажсан тохиолдолд л оролцох боломжтой юм. Энэ хүрээнд 2025 онд AI технологиор бүтээсэн жүжигчин Тилли Норвудын жишээ цаашид шаардлага хангахгүйд тооцогдоно. Мөн Вэл Килмер нас барснаас хойш түүний AI хувилбарыг кинонд ашигласан явдал энэ шийдвэрт нөлөөлсөн гэж үзэж байна.
