Lalisa Manobal буюу BLACKPINK хамтлагийн Лиса шинэ тансаг автомашинаа олон нийтэд дэлгэн үзүүлж, цахим орчинд дахин шуугиан тарилаа.
Тэрбээр даваа гарагт өөрийн сошиал хуудастаа улаан өнгийн спорт автомашины зураг нийтэлж, “My New Baby” хэмээн тайлбар бичсэн байна. Зурагт харагдаж буй автомашин нь Италийн автомашин үйлдвэрлэгч Ferrari-ийн хамгийн алдартай загваруудын нэг болох Ferrari Testarossa хэмээн шүтэн бишрэгчид болон автомашины хорхойтнууд таамаглажээ.
Лиса өмнө нь ч хэд хэдэн өндөр үнэтэй супер автомашин эзэмшдэг гэдгээ харуулж байсан бөгөөд түүний энэ удаагийн худалдан авалт мөн л олон нийтийн анхаарлыг татав.
Шинэ автомашины тухай мэдээлэл нь Лисаг 2023 онд Seongbuk-dong дүүрэгт байрлах 7.5 тэрбум воны буюу ойролцоогоор 5 сая ам.долларын үнэтэй тансаг байшин худалдан авсан гэх мэдээллийн дараахан гарч байгаа юм. Уг байшин нь нэг давхар зоорь, хоёр давхар үндсэн байгууламжаас бүрдэх бөгөөд тэрээр худалдан авалтын төлбөрөө бүхэлд нь бэлнээр төлсөн гэж мэдээлж байв.
Хөгжмийн уран бүтээлээс гадна Лиса олон улсын тавцан дахь байр сууриа улам бэхжүүлсээр байна. Тэрээр энэ сарын 12-нд АНУ-ын SoFi Stadium цэнгэлдэх хүрээлэнд болсон FIFA World Cup-ын нээлтийн ёслолд оролцож, үзүүлбэр үзүүлсэн юм.
Дэлхий даяар хамгийн олон дагагчтай K-pop уран бүтээлчдийн нэг болох Лиса карьерын амжилт төдийгүй тансаг хэрэглээ, амьдралын хэв маягаараа үргэлж анхаарлын төвд байсаар байна. Түүний шинэ автомашины зураг нийтлэгдсэн даруйд сая сая хандалт авч, шүтэн бишрэгчдийн дунд өргөн хэлэлцүүлэг өрнүүлжээ.
