Хувцас загварын салбарын нэр хүндтэй хэвлэл Vogue сэтгүүлийн нүүрийг энэ удаад Холливуудын нэрт жүжигчин Мэрил Стрип болон тус сэтгүүлийг олон жил удирдсан Анна Винтур нар хамтран чимжээ.
Стрип нь 2006 онд гарсан Прада өмссөн чөтгөр кинонд хатуу, бардам редактор Миранда Пристлигийн дүрийг бүтээж, дэлхий дахинд танигдсан бөгөөд уг дүрийг Винтураас сэдэвлэсэн гэх яриа олон жил яригдсаар ирсэн юм.
Энэ талаар Винтур сэтгүүлд өгсөн ярилцлагадаа “Мэрил Стрип миний дүрийг бүтээсэнд баяртай байдаг ч Пристлигийн дүр бодит Винтураас их өөр” хэмээн онцолжээ. Мөн мэргэжлээ солих боломжийн талаар асуухад “Надад ямар ч уран сайхны авьяас байхгүй. Би дуулж, бүжиглэж, жүжиглэж чаддаггүй. Хоол хийж, оёж ч чаддаггүй. Миний гар бараг ямар ч ашиггүй” хэмээн хариулсан байна.
Тус кино нь Лорен Вэйсбергэр-ийн ижил нэртэй зохиолоос сэдэвлэн бүтээгдсэн бөгөөд зохиолч нь тухайн үед “Vogue” сэтгүүлд Винтурын туслахаар ажиллаж байсан түүхтэй.
2006 оны уг бүтээлийн үргэлжлэл болох The Devil Wears Prada 2 кино ирэх сард нээлтээ хийхээр төлөвлөгдөж байна.
Сонирхолтой нь, Винтур болон Стрип нар зөвхөн уран бүтээлээр холбогдоод зогсохгүй, Ancestry платформын ургийн бичгийн судалгаагаар зургаа дахь үеийн үеэлүүд болох нь тогтоогджээ.
Анна Винтур нь Vogue сэтгүүлийг 30 гаруй жилийн турш удирдаж, поп соёлын нөлөө бүхий эрхмүүдийн нэг болсон бөгөөд өнгөрсөн онд албан тушаалаасаа буусан билээ.
