Итали улсын Болонья хотноо зохион байгуулагддаг Болоньягийн хүүхдийн номын үзэсгэлэнгээс жил бүр тодруулдаг “The BRAW Amazing Bookshelf” жагсаалтад Монгол уран бүтээлчийн бүтээл албан ёсоор багтлаа.
2026 оны хүүхдийн номын салбарын чиг хандлагыг тодорхойлох уг жагсаалтад зураач, зохиолч Э.Мишээлийн “Үр минь чамайг хүлээж байна” (World Awaits You, Child) бүтээл нэрлэгдсэн байна. Тус номыг “Гэрэн Паблишинг” хэвлэлийн газар 2024 онд эрхлэн гаргажээ.
Болоньягийн хүүхдийн номын үзэсгэлэн нь дэлхийн 70 гаруй орны 4000 гаруй бүтээл өрсөлддөг, салбарынхаа хамгийн нэр хүндтэй арга хэмжээний нэг бөгөөд шүүгчид эдгээрээс онцгой шийдэл, уран сайхны өндөр түвшинд бүтсэн шилдэг бүтээлүүдийг шалгаруулж “Amazing Bookshelf” жагсаалтад багтаадаг уламжлалтай.
