Байгаль орчин, уур амьсгалын өөрчлөлтийн яамны Байгаль орчны улсын хяналтын газар болон нийслэлийн Байгаль орчны газар хамтран Улаанбаатар хотод үйл ажиллагаа явуулж буй авто засварын газруудад төлөвлөгөөт бус хяналт шалгалтыг эхлүүллээ.
Тус шалгалтыг 01/13 дугаартай удирдамжийн хүрээнд зохион байгуулж байгаа бөгөөд авто засварын үйлчилгээ эрхлэгч иргэн, аж ахуйн нэгжүүдийн байгаль орчинд үзүүлэх нөлөөлөл, холбогдох хууль тогтоомжийн хэрэгжилтийг бодит нөхцөлд үнэлэх зорилготой юм.
Шалгалтаар дараах асуудлуудыг хамруулан шалгаж байна.
Байгаль орчинд нөлөөлөх байдлын үнэлгээ, менежментийн төлөвлөгөөний хэрэгжилт
Ус ашиглалт, зөвшөөрөл, төлбөрийн биелэлт
Хог хаягдлын ангилал, хадгалалт, тээвэрлэлт, гэрээний хэрэгжилт
Аюултай хог хаягдлын бүртгэл, хадгалалт, дахин боловсруулалт
Ашигласан тос болон шингэн хаягдлын менежмент
Ариун цэвэр, орчны стандартын хангалт
Мөн шаардлагатай тохиолдолд агаар, хөрс, уснаас дээж авч лабораторийн шинжилгээ хийж, гарч болзошгүй эрсдэлээс урьдчилан сэргийлэх, илэрсэн зөрчил дутагдлыг арилгуулах арга хэмжээг авч ажиллана.
Шалгалтын хугацаа: 2026 оны 3 дугаар сарын 19-ний өдрөөс 2026 оны 4 дүгээр сарын 9-ний өдөр хүртэл үргэлжилнэ.
АНХААРУУЛГА
Авто засварын үйл ажиллагаанаас гарч буй:
ашигласан тос
аккумлятор, батарей нь Монгол Улсын Засгийн газрын 2018 оны 116 дугаар тогтоолоор батлагдсан Аюултай хог хаягдлын жагсаалтын:
1302 дугаар дэд бүлэг (тос, тосолгооны хаягдал)
1603 дугаар дэд бүлэг (батарей, аккумлятор) -д хамаардаг.
ЗӨВЛӨМЖ
Иймд иргэн, аж ахуйн нэгж, байгууллагууд нь өөрийн үйл ажиллагаанаас үүссэн аюултай хог хаягдлыг:
эрх бүхий байгууллагад
эсхүл тогтоосон тусгай цэгт хүлээлгэн өгөхийг анхааруулж байна.
Нийслэлийн Байгаль орчны газар
