2025 оны 6 дугаар сарын 25-28-ны өдрүүдэд БНСУ-ын Пусан хотын “BEXCO” Олон улсын үзэсгэлэнгийн танхимд зохион байгуулагдах 32 дахь удаагийн Пусаны Олон Улсын Хоол Хүнсний Үзэсгэлэнд Монгол Улсаас БНСУ-ын Пусан хотод суугаа Консулын газрын дэмжлэгтэйгээр Монгол Улсын үндэсний үйлдвэрлэгч “Витафит Инвест” ХХК оролцохоор бэлтгэл ханган ажиллаж байна.
Тус үзэсгэлэнг БНСУ-ын Аж үйлдвэрийн маркетинг судалгааны хүрээлэн жил бүр уламжлал болгон зохион байгуулдаг бөгөөд энэ жил хоол хүнс, ширээ чимэглэл, органик бүтээгдэхүүн зэрэг өргөн сэдвийг хамарсан олон арга хэмжээг нэг дор нэгтгэсэн томоохон олон улсын арга хэмжээ болон зохион байгуулагдаж байна. Үзэсгэлэнд дэлхийн 400 гаруй албан байгууллага, 800 орчим павильон оролцдог өргөн цар хүрээтэй үзэсгэлэн юм.
“Витафит Инвест” ХХК нь 28 жилийн турш шүүс, ундааны үйлдвэрлэл эрхэлж буй үндэсний томоохон үйлдвэрлэгч бөгөөд 2025 оноос эхлэн Монгол улсад үйлдвэрлэсэн “Монгол лууван” брэндийн “Луувангийн нухаш” бүтээгдэхүүнээ БНСУ-ын зах зээлд нэвтрүүлж, худалдааны хамгийн том цахим платформ болох “COUPANG” сайтаар дамжуулан албан ёсоор борлуулж эхлээд байна.
Тус компани нь уг үзэсгэлэнд эрдэс бодисоор баялаг Монголын хөрсөнд ургасан түүхий эдээр боловсруулсан “Монгол Лууван” төслийн луувангийн нухаш болон “Натура” нэрийн 100% жимс, ногооны шүүс зэрэг бүтээгдэхүүнээрээ оролцох юм.
Монгол Улсын Гадаад Харилцааны Яам Ministry of Foreign Affairs of Mongolia Batmunkh Battsetseg Батмөнхийн Батцэцэг Embassy of Mongolia in Seoul
