Цахим орчинд идэвхтэй хүмүүсийн хувьд амралтын өдөр гэж байдаггүй бололтой. “Туулын хурдны зам” Улаанбаатар хотын уушгийг цоо хатгаж, нийслэлийн иргэдийн ундны усанд заналхийлж байгаа тухай мэдээллээр амралтын өдөр амьсгалав. “Туулын хурдны зам” түгжрэлд огт нөлөөлөхгүй. Хотын иргэд энэ замаар явах шаардлагагүй. Гүүр барилаа гээд түгжрэл буурдаггүй юм. Энэ төслийг дэмжээд байгаа хүмүүс нь ус битгий уугаарай. Эх орондоо хайргүй худалдагдсан троллууд л энэ төслийг дэмжинэ. Нэг километр нь 70 тэрбумын өртөгтэй бүтээн байгуулалт дэлхийд байхгүй. Та нар Сэлбийг яасан билээ, яг л тийм зүйл болно. Бүтээн байгуулалтаа хий, гэхдээ Туул голыг битгий сүйтгэ. Нямбаатар зайлаасай. Нямбаатар энэ төслөө аваад зайл. Нямбаатар аа, чи чадахгүй ээ.. Утсаа нээхийн төдийд л цаг, цагийн зайтай хөврөх эдгээр агуулга нийслэлийн иргэдийг хоёр талд талцуулан бухимдуулав.
Атал Засгийн газар, Ерөнхийлөгч, УИХ талаас одоог хүртэл ямар нэгэн мэдээлэл өгөөгүй байна. Сайд нар болон гишүүд ямар нэгэн байр суурь илэрхийлсэнгүй. 2012 оноос хотын тойрог зам барих тухай хөндөгдөж, үе үеийн хотын дарга нарын автор болох санаачилгууд ажил хэрэг бололгүй явсаар Л.Оюун-Эрдэнийн засгийн газрын үед, “Улаанбаатар хотын 2030 он хүртэлх хөгжлийн ерөнхий төлөвлөгөө”-ний хүрээнд батлагдсан Туулын хурдны зам улс төржөөд гацах уу, бүтээн байгуулалт болж үргэлжлэх үү гэдэг хоёр асуултын өмнө байна.
Туул голын нийт урт нь 888 км, туулын хурдны зам дайрч буй хэсэг нь 32 км буюу голын нийт уртын 3.6 хувийг эзэлж байна. Голын дагуу баригдах хурдны замын зурвас замын тэнхлэгээсээ 50 метр буюу 494.094 га талбайг хамарна. Үүнээс 40.817 га талбай нь бургасан ой, 13057 га талбай нь улиас бургас байгаа нь нийт замын трассын талбайтай харьцуулахад бургасан ойн хамрах талбай 10.1 хувь. Засгийн газрын хуралдаанаар батлагдаж, тендер зарлаж, бүтээн байгуулалтын ажил эхлэх өдрөөс нийгмийн сүлжээнд төслийн тухай хэлэлцүүлгүүд өрнөсөөр буй..
Туул голын экосистемийг хамгаалахын тулд Туулын хурдны замын төслийг дэмжихгүй гэдгээ илэрхийлэн дуу хоолой болж байгаа хүмүүсийн төлөөлөлд урлаг, хэвлэл мэдээлэл, инфлюнсер манлайлж байна. Харин мэргэжлийн инженерүүд одоо өрнөөд буй маргаанд ул суурьтай тайлбар, мэдэээлэл өгч буй нь ховор. Ингээд харахаар зөв эсвэл буруу гэж хуваагдчихаад байгаагаас аль аль тал нь тодорхой мэдээлэл, үндэслэлгүй. Олон нийтэд учирлаад ойлгуулах чадамжгүй л маргалдаад байх шиг. Уг нь улс төржилтөөс ангид байж, эрүүл ухаанаар шинжлэх ухааны үндэслэлтэй хоорондоо ойлголцож, сошиалаар биш бодит амьдрал дээр ажил хэрэг урагшилбал сайнсан.
