Улсын Нэгдүгээр Төв эмнэлгийн Гастроэнтерологийн төвийн эмч, АУ-ны доктор Г.Анар сар шинийн баярын хооллолттой холбоотой зөвлөгөө өгөв. Тэрбээр, “Монголчуудын хэрэглэдэг хоол хүнс ихэнхдээ цөсийг их өтгөрүүлж, чулуу үүсгэх улмаар нойр булчирхайг үрэвсүүлдэг. Мөн дээрээс нь нэг дор их идэх, зохисгүй хооллохтой холбоотойгоор хоол боловсруулах замын өвчлөл, зовуурь үүсгэдэг. Ялангуяа баярын үеэр замбараагүй хооллосноос болж цөс, нойр булчирхай өвдөх, эмнэлгээр үйлчлүүлэх иргэдийн тоо эрс нэмэгддэг. Иймд хоол шингэхгүй, цанхайх, аюулхай, хэвлийгээр бүсэлхийлж өвдөх, цээж хорсох зэрэг зовуурь илэрдэг бол аль болох хөнгөн хооллох, эслэгээр баялаг хүнс түлхүү хэрэглэх, шаардлагатай бол хоол шингээх эмийг эмчийн заавраар хэрэглэхийг зөвлөж байна” гэсэн юм.
