Сургуулийн өмнөх боловсролын сургалт, үйл ажиллагаанд STEAM сургалтын хэрэглэгдэхүүнийг үр дүнтэй ашиглах арга зүй сэдэвт цахим сургалтыг Боловсролын яам, Боловсролын ерөнхий газар, MonSTEAM-Монголын STEAM боловсролын академи хамтран зохион байгууллаа.
Хүүхдийн цэцэрлэгийн багш, арга зүйч нарт STEAM сургалтын суурь ойлголт, арга зүйг таниулах, сургалтын хэрэглэгдэхүүнийг хүүхдийн нас, хөгжлийн онцлогт нийцүүлэн үр дүнтэй ашиглах мэдлэг, чадварыг дэмжихэд тус сургалтын зорилго оршино.
Мөн багшийн ажлын ачааллыг бууруулах, сургалтын чанарыг сайжруулахад AI хэрэгслийг ашиглах боломжийн талаар ойлголт, агуулгыг багтаасан байна.
2025-2026 оны хичээлийн жилд STEAM сургалтын хэрэглэгдэхүүн, “Багшийн гарын авлага” тараагдсан аймаг, дүүргийн 56 цэцэрлэгийн 100 гаруй эрхлэгч, арга зүйч, бүлгийн багш, сургуулийн өмнөх боловсрол хариуцсан ахлах арга зүйч, мэргэжилтэн цахим сургалтад хамрагдаад байна.
Сургалтын үр дүнд оролцогчид сургуулийн өмнөх боловсролд STEAM сургалтыг хэрэгжүүлэх суурь ойлголтоо нэмэгдүүлж, STEAM сургалтын хэрэглэгдэхүүнийг насны онцлогт тохируулан ашиглах арга зүйн мэдлэгээ сайжруулсан байна.
Мөн AI хэрэгслийг ашиглах боломж, чиг хандлагын талаарх мэдлэг, ур чадвараа дээшлүүлж, STEAM арга зүйг сургалт үйл ажиллагаандаа илүү үр дүнтэй хэрэгжүүлэхэд чиглэсэн туршлага, арга замын талаар санал солилцлоо.
