Амьдралын олон талт хэв шинжээс хамаарч шөнийн нойргүй явдаг хүмүүс бишгүй их. Үүнд: Завгүй амьдралын хэв маяг, ээлжийн ажил хийдэг, бие болон сэтгэлзүйн эрүүл мэндийн шалтгаантай гэх мэт. Гэвч ямар ч шалтгаантай байсан бүтэн шөнийг унталгүй өнгөрөөх нь тархийг ядраахаас гадна, тархины хөгшрөлтийн явцыг хурдасгадаг.
Энэ талаар Цюрихийн их сургуулийн эрдэмтэд нойргүйдэлд тархи хэрхэн хариу үйлдэл үзүүлдгийг ойлгохын тулд дунджаар 25 орчим насны 134 залуугийн MRI шинжилгээнд дүн шинжилгээ хийжээ. Судалгаанд нойргүй хоносны дараах өдрийн тархины өөрчлөлтийг хэмжсэн байна.
Судалгааны үр дүнд нойргүй хоносон үед хүний тархи байх ёстой наснаас нэгээс хоёр насаар хөгширч, үйл ажиллагаа удааширдаг болохыг тогтоожээ. Нойргүй явах нь эрүүл мэндэд олон сөрөг үр дагавартай. Жишээлбэл тархины үйл ажиллагаа суларч, амьдралын чанар буурч, архаг өвчин тусах эрсдэл нэмэгддэг. Нас ахих тусам тархи хөгширч, олон өөрчлөлтүүд илэрдэг. Ялангуяа суралцах, санах ой, нарийн төвөгтэй ажлуудыг гүйцэтгэх чадвар зэрэг буурдаг. Тархи хөгшрөлтийн хамгийн эхний шинж тэмдэг нь танин мэдэхүйн үйл ажиллагаа буурах байдаг.