Сүүлийн үед алдарт хөлбөмбөгчин Дэвид Бэкхэм, загварын ертөнцийн нөлөө бүхий эрхэм Викториа Бэкхэм болон тэдний ууган хүү Бруклин Бэкхэм, түүний эхнэр Никола Пэлтц нарын хооронд үүсээд буй гэр бүлийн маргаан олон нийтийн анхаарлыг татаад буй. Энэхүү дуулиант асуудалд удаан хугацаанд нам гүм байсан Николагийн аав, тэрбумтан бизнесмен Нельсон Пэлтц анх удаа олон нийтийн өмнө байр сууриа илэрхийлжээ.
Тодруулбал, 83 настай Нельсон Пэлтц саяхан WSJ Invest Live арга хэмжээнд оролцох үеэрээ уг маргаантай холбоотой асуултад хариулахдаа “Манай гэр бүл сүүлийн үед хэвлэл мэдээллээр гарч байгаа юм уу? Би огт анзаараагүй юм байна” хэмээн хошигноод “Миний Николад өгөх зөвлөгөө бол хэвлэл мэдээллээс аль болох хол байх. Миний охин болон Бэкхэмийн гэр бүлийн гишүүдийн хоорондын асуудлыг олон нийтийн өмнө ярих нь тохиромжгүй. Харин би охиноо ямар гайхалтай хүн болохыг, мөн хүргэн Бруклин маань ямар сайхан залуу болохыг онцолж хэлмээр байна. Би тэднийг хамтдаа аз жаргалтай, урт удаан амьдраасай гэж чин сэтгэлээсээ хүсдэг” гэжээ.
