Дорноговь аймагт зохион байгуулагдах “Их говийн тэмээ–2026” арга хэмжээний хүрээнд 223 тэмээчин бүсгүй нэг дор цугларч, Гиннесийн дээд амжилт тогтооно. Энэхүү түүхэн үйл явдал нь монгол эмэгтэйчүүдийн манлайлал, санаачилга, эрэмгий дайчин, зоригт чанарыг дэлхий дахинд таниулах онцгой ач холбогдолтой юм.
Уг арга хэмжээ Дэлхийн тогтвортой хөгжлийн зорилтуудын хүрээнд зохион байгуулагдаж байгаа бөгөөд нүүдэлчин ахуй, уламжлалт соёлыг олон улсад сурталчлахын зэрэгцээ Монгол Улсын нэрийг дэлхийн дээд амжилтын түүхэнд албан ёсоор бүртгүүлэх зорилготой.
“Их говийн тэмээ–2026” арга хэмжээг 2026 оны нэгдүгээр сарын 31, хоёрдугаар сарын 1-ний өдрүүдэд Дорноговь аймгийн Сайншанд суманд зохион байгуулна.